فائیق گوڵپی
لە شەستەکانی سەدەی ڕابوردوەوە بنەماڵەی بەرزانی دەستیان بە سەر پارتی دیموکراتی کوردستاندا( پ د ک) گرتوە، لەو کاتەوە ئەو حزبە دژی دیموکراسی و دژی مافەکانی گەلی کورد بەکاردەهێنن.
هێزی چەکداری حزب و پێوەندییە عیراقی و ناوچەیی و جیهانییەکانیان بۆ دژایەتی ئەو حزب و پێکهاتە سیاسییانە بەکاردەهێنن کە هەوڵی چارەسەرکردنی کێشەی کورد دەدەن.
بەرامبەر بەوەی دوژمنان چەک و جبەخانەیان پێبدەن تا دژی هێزە کوردییەکان بەکاریبێنن، خەبات و قوربانی گەلی کورد و سامان و خاکی کوردستانیان پێشکەشدەکەن.
١ .لە سەرەتای شەستەکاندا لە سەردەمی شۆڕشی ئەیلولدا،مەلا مستەفا رەخنە و سەرنجەکانی مەکتەبی سیاسی حزبەکەی پێهەرسنەکرا، بە بەکارهێنانی هێز وەڵامیدانەوە، سەرئەنجام جیابونەوەی حزب ڕویدا و خولی یەکەمی شەڕی ناوخۆ دەستیپێکرد.
٢ .لە کۆتایی شەستەکانی سەدەی بیستدا لە سەردەمی شۆڕشی ئەیلولدا، جوڵانەوەیەکی سیاسی لە پێناو ماف و ئازادی گەلی کوردا لە ڕۆژهەلاتی کوردستان سەریهەڵدا، بۆ ڕازیکردنی شای ئێران، سەرکردایەتی ئەو کاتەی پارتی سەرکردەکانی ئەو جوڵانەوەیەی دەستیگردن و شەهیدکردن، تەرمەکانیانی ڕادەستی ئێران کردەوە.
٣ .لە حەفتاکانی سەدەی بیستدا لە کاتی ڕێکەوتنی ئازاردا،لە باکوری کوردستان جوڵانەوەیەکی سیاسی سەریهەڵدا، بارزانییەکان سەرکردەی ئەو جوڵانەوەشیان لە ناوبرد و هەندێک سیناریۆی نالۆجیکیان بۆ تاوانەکەیان داڕشت.
٤ .لە کۆتایی حەفتاکانی سەدەی بیستدا دوای سەرکەوتنی ئیمام خومەینی بەسەر شای ئێراندا، لە ڕۆژهەڵاتی کوردستان جوڵانەوەی سیاسی دەستیپێکردەوە، بەرزانییەکان بێ یەک و دو خۆیان گەیاندە ئێرانی خومەینی و لەگەڵ سوپای پاسداراندا دەستیان بە سەرکوتکردنی ئەو جولانەوە سیاسییەش کرد.
٥ .لە هەشتاکانی سەدەی بیستەوە شۆڕشێکی سیاسی و سەربازی لە باکوری کوردستان بۆ مافە ڕەواکانی گەلی کورد سەریهەڵداوە، لەو کاتەوە بەرزانییەکان بە پێشمەرگەی کورد و بە زانیاری هەواڵگری هاوکاری سوپای تورکیا دەکەن بۆئەوەی ئاشبەتاڵ بەو شۆڕشە بکەن.
٦. لە ساڵی٣-٨- ٢٠١٤ پێشمەرگەی بەرزانییەکان شەنگاڵیان ڕادەستی داعش کرد، کە چەکدارەکانی داعش پەلاماری شەنگاڵیاندا، پێشمەرگەی پارتی نەک هەر بەرگرییان نەکرد، پاشەکشەییان کرد و خەڵکی شەنگاڵیان بۆ جینۆسایدی دەستی داعش بەجێهێشت.
٧. ساڵی ٢٠٢٠ پارتی و حکومەتی عێراق و تورکیا، بە ناوی ڕێکەوتنی شەنگاڵ، رێکەوتنێکی پیلانگێریان دژی ئەو پێکهاتە سیاسییە ئیمزاکرد کە لە کاتی پەلامارەکەی داعشدا بەرگریان لە خەڵکی شەنگال کرد و پیلانگێڕی نێوان بەرزانییەکان و داعشیان ئاشکرا کرد.
٨. دوای چل ساڵ بەردەوامی شۆڕشی باکورد لە باکور، کە بەرزانییەکان بۆیاندەرکەوت بەو ڕێکەوتنە کلاسیکییەی نێوان تورکیا و پارتی ناتوانن شۆڕشی باکور لەناوبەرن، لە بەرواری ٣-٧-٢٠٢٤ وە بەرزانییەکان ڕێگەیاندا سوپای تورکیا سنوری نێودەوڵەتی ببەزێنێ، لە ڕیگەی جادەی قیرتاوی شارەکانی زاخۆ و دهۆک و ئامێدییەوە، بە بەرچاوی خەڵکی کوردستان و میدیاکانی جیهانەوە، بە چەک و دەبابە و تۆپ و ناقلە و ماشێنی سەربازییەوە بێتە سەرخاکی هەرێم و دەستبەسەر ئەو ناوچەیەدا بگرێت کە لە ژێر کۆنترۆڵی گەریلاکانی شۆڕشی کوردا بوو.
٩. لە دوای ڕاپەڕینەوە تا ئەمڕۆ دەرفەت هەبوو دەزگاو رێکخراوی نەتەوەیی و نیشتمانی لە پێناو ئاشتی کۆمەلایەتی و سیاسەتی نەتەوەیی کوردا پێکبهێنرێن، لەو بوارەدا هەوڵدان هەبوە، پارتی بەردەوام خۆی لەم دەزگاو ڕێکخراوانە بەدورگرتوە و خۆشی پرۆژەی نەبوە.
بۆ نمونە هەمو حزبەکانی کوردستان لە کۆنگرەی نەتەوەیی کوردستان ( K N K)دا بەشداریان کردوە، بێجگە لە پارتی و هاوئاوازەکانی، هەمو حزبەکانی باشوری کوردستان لە کۆمەڵەی پێشمەرگە دێرینەکانی کوردستاندا بەشدارییانکردوە، بێجگە لە پێشمەرگە دێرینەکانی پارتی.
١٠. لە هاوینی ئەمساڵدا مەسعود بەرزانی دەستی بە جوڵەی دبلۆماسی کرد، سەردانی بەغدادی کرد و لەگەڵ بڕیاربەدەستانی عێراق کۆبوەوە، خەڵک وایدەزانی بۆ دەستکەوتی گەلی کورد ئەو سەفەرەی کردوە و هەوڵی ئەدا کێشەکانی موچەی کارمەندانی هەرێم چارەسەربکات، کەچی دەرکەوت کۆبونەوەکانی بۆ ئەوەبوو ڕەوایی بدات بەو سیاسەتە نانەتەوەیی و نانیشتمانییەی کە ڕیگەی بە سوپای تورکیا داوە بەشێکی خاکی باشوری کوردستان لە پێناو لەناوبردنی پ ک ک دا داگیربکات.
بەشیکی تری جوڵە دبلۆماسییەکەی بەرزانی بۆ بەغدا بۆ ئەوەبوو ڕیگە نەدات پارێزگاری کەرکوک بەر کورد بکەوێت، بەر حزبە ڕکەبەرە براوەکەی ( یەکێتی) بکەوێت. لەسەر کێشەی کەرکوک مەسعود بەرزانی لەگەڵ تورکمان و عەرەبەکان دادەنیشێت و ڕێکدەکەوێت، بەڵام لەگەڵ بەرپرسانی کوردی هەرێم دانانیشێت و ڕێکناکەوێت.
لیستی ئەنجومەنی پارێزگای کەرکوکی پ د ک لەگەڵ بەرەی تورکمانی و لەگەڵ لیستی عەرەبەکانی کەرکوک ڕێکدەکەوێت، بەلام لەگەڵ لیستی کوردی( یەکێتی) کە زۆرینەی دەنگی بەدەستهێناوە ڕێکناکەوێت.
ئەگەر لیستی پارتی لەگەڵ لیستی یەکێتی ڕێکبکەون و هاوپەیمانی کورد دروستبکەن، کورد لیستی یەکەم دەبێت و پۆستی پارێزگاری کەرکوک مسۆگەر دەکات، بەڵام پارتی ئەوە ناکات، کار دەکات بۆ ئەوەی پاریزگاری کەرکوک بەر یەکێتی نەکەوێت، ئەو کات پارێزگاری کەرکوک بەر کورد ناکەوێت.
باشە هێزێکی سیاسی بە درێژایی مێژو تا ئەمڕۆ بەو شێوەیە لەگەڵ هێز و پێکهاتە سیاسییەکانی کورد و دۆزی کورد جوڵابێتەوە، ئەوە هێزێکی کوردییە یان هێزێکی دژە کوردییە و ئاستەنگی جدی بۆ چارسەرکردنی کێشەی کورد دروستدەکات؟؟.
من لەگەڵ ئەوەشدا لە ناوچەیەکدا ژیام لەسەدا نەوەدی زیاتری پارتی بون و باوکم شەهیدی سەرەتای شۆڕشی ئەیلول بو، هەر لە منداڵییەوە لە سیاسەتی بەرزانییەکان و حزبەکەیان تێگەیشتم،هەر زوو بە کوردم نەزانیون، بە دوژمنی کوردم زانیون و لەو کاتەوە بەربەرەکانێی سیاسەتەکانیان دەکەم، دە ئێوەش ئەو هەمو تاوانەیان ببینن، بە بەرزانییەکان و حزب و دارودەستەکەیان بڵین چیتر دوژمنایەتیکردنی گەلی کورد و کوردستانتان لێقبوڵناکەین.
ئەم وتارە ڕاوبۆچوونی نووسەر خۆیەتی
