ئازاپرێس
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە کەسایەتی دیاری بارزان و کوردستان بەڕێز شێخ ئەدهەم عوسمان شێخ ئەحمەد بارزانی کرد.
لەدیدارێکدا کە د.هاوڕێ شێخ دارۆ، ئەندامی مەکتەبی سیاسی ئامادەیبوو، دواپەرەسەندنەکان لەسەر ئاستی گۆڕەپانی سیاسی هەرێمی کوردستان، عیراق و ناوچەکە تاوتوێکرا و جەخت لە هەماهەنگی و هاریکاری زیاتر لە نێوان هێزە شۆڕشگێڕەکان و دەربەستی کوردایەتی و کەسایەتییەکانی کرایەوە کە پەرۆشی بنیادنانی حکومڕانییەکی تەندروستن.
لەدیدارەکەدا سەرۆک بافڵ وێڕای بە گەرمی بەخێرهێنانەوەی لە تەندروستی پرسی و بەڕێزەوە لە رۆڵ و پێگەی بەڕێزیان و شێخانی بارزانی رووانی کە رۆڵیان لە خەبات و تێکۆشانی کوردایەتی و چاکەکاریدا دیار و بەرچاو بووە.
هاوکات شێخ ئەدهەم سوپاس و پێزانینی خۆی بە سەرۆک بافڵ گەیاند لەبەرامبەر وتارەکەی و نرخاندی بۆ پێگەی شێخی بارزان, شێخ ئەحمەدی بارزانی، ووتی ئەوە جێگای ڕێز و تەقدیری هەموومان بوو و بەدڵ سوپاست دەکەین.
هەر لەو دیدارەکەدا شێخ ئەدهەم پشتیوانی تەواوی بۆ سیاسەتەکانی سەرۆک بافڵ دەربڕی و رایگەیاند هەڵوێستەکانت لەسەر ئاستی کوردستان و عیراق و بابەتە نەتەوەییەکان جێگای پێزانینمانە و وەک هەمیشە هیوای سەرکەوتنت بۆ دەخوازین.
