فائیق گوڵپی
لە نێوان خەڵکی کوردستان ودەسەڵاتی بنەمالە خاکفرۆش و کوردکوژ و دزەکانی هەرێمدا ناکۆکییەکی وا گەورە دروستبووە بە سیناریۆی چەواشەکارانەو پەیامی گەجەروگوجەرەکانیان کپنابێتەوە تا لە ٢٠-١٠ بە قازانجی خەڵک یەکلانەبێتەوە.
ململانێی خەڵک لەگەڵ دەسەڵاتدا لەسەر نەبونی موچە و ئاو و کارەباو و نەوت، هەموو چین و توێژەکانی کۆمەڵگای دژی دەسەڵات ڕیکخستوە.
دەسەلات مامۆستایانی وانەبێژ و دەرچوانی زانکۆ و پەیمانگاکانی سالانی ڕابوردو دانامەزرێنێ و کاریان بۆ نادۆزێتەوە، ئەم توێژە بێکارە شەڕ و ململانێی چارەنوسسازیان لەگەڵ دەسەلاتدا هەیە، چاوەڕوانی ڕۆژی تۆڵەو سەرکەوتنی ئیرادەی گەلی رۆژی ٢٠-١٠ دەکەن.
پێشمەرگە و هێزە ئەمنییەکانی هەرێم کە زۆرینەیان لە حزبە دەسەڵاتدارەکانن و دەسەڵات بە بەرگریکاری خۆی دەزانێت، هێندە دەردی بێموچەیی و بێ ئاو و کارەبایی و تاوانی تری دەسەڵاتیان دیوە، لە توێژەکانی تری کۆمەڵگا زیاتر بۆ چارەسەرێک دەگەڕین، لە تویژەکانی تر زیاتر چاوەڕوانی ڕۆژی ٢٠-١٠- دەکەن تا لەو دەسەلاتە نادادپەروەرە ڕزگاریان ببێت.
ململانێی ڕۆشنبیر و کەسانی نەتەوەیی لەگەڵ دەسەڵات لەسەر پەلکێشکردنی سوپای داگیرکەران و زاڵکردنی زمان و کڵتوری بێگانە بەسەر کڵتوری گەلی کوردا، ڕۆشنبیران و نەتەوەییەکانی هەرێمی دژی دەسەڵات ڕێکخستوە و چاوەڕوانی تۆڵەی رۆژی ٢٠-١٠ دەکەن.
ئەو هەموو باجەی کە بەبێ بنەماییەکی یاسایی دەسەڵات بەسەر کاسبکارانی هەرێمدا سەپاندویەتی، چالاکی ئابوری و بازرگانیی هەرێمی پەکخستووە. ،لەبەرامبەردا دەسەلات دەستی کۆمپانیا و بازرگانانی وڵاتانی بێگانەیان لە هەرێم واڵاکردووە، ئەمە وایکردووە کاسبکارانی هەرێم بەرامبەر بە دەسەلاتی نانیشتمانی خۆیان رێکبخەن لە ٢٠-١٠ چاوەڕوانی ڕۆژی ئازادبونی خۆیان و راستکردنەوەی ژێرخانی ئابوری کوردستان بکەن.
کەچی دەسەلاتداران لە ڕیگەی گەجەڕوگوجەرەکانیانەوە دەیانەوێت ئەم راستیانە لە بیری خەڵک ببەنەوە، هەوڵدەدەن ناکۆکی و شەڕی نێوان خەڵک و دەسەلات پەردەپۆشبکەن، شەڕی خەڵک بۆکۆتاییپیهێنانی دەسەڵاتدارەکان بگوێزنەوە بۆ شەڕی نێوان سەرەمێکوتەکانی دەسەڵات، بە زیقەزیقی لە هەولێرەوە حوکمی هەرێم دەکەین و مەگەر لە مەریخەوە سەیری هەولێر بکەن، هەوڵدەدەن برسێتی و بێئاوی و بێنەوتی و گرانی بەنزین و دزییەکانی خۆیان لە بیری خەڵک ببەنەوە، بە دەنگەناسازەکانی لابردنی مەسروربەرزانی لە سەرۆکی ئەنجومەنی وەزیرانی فاشل و دیاریکردنی مەسروربەرزانی وەک سەرۆک وەزیرانی کابینەی دوای هەڵبژاردنی چاوپێنەکەوتوو، دەیانەوێت تاوانەکانی ئابوری سەربەخۆو ریفراندۆم وپەلکێشکردنی سوپای داگیرکەران لە بیری خەڵکی کوردستان ببەنەوە.
با بنەمالە دەسەڵاتدارەکان و چاوشەکانیان باش بزانن، خەڵک لەوان زۆر ژیرتر و بە ئیرادە ترە، دەزانێ ڕۆژی ٢٠-١٠ چۆن سزایان بدەن، بۆیە باشترە هەر لە ئێستەوە دەسەڵاتداران و ژێرپێیەکانیان ئالای سپی هەڵکەن و خۆیانبدەن بەدەست ئیرادەی خەڵکی کوردستانەوە و کەنار بگرن و تا هەڵنژاردنێکی تر عاقڵانە لە ماڵەوە بۆ خۆیان دانیشن.
