ئازا پرێس
بەگوێرە راپۆرتێک کە ئەمڕۆ ئاژانسی مەعلومەی عێراقی بڵاوی کردۆتەوە، رایدەگەێنێ کە لەماوەیەکی نزیکدا پەرلەمانی عێراق سەرۆک وەزیران مەحمەد شیاع سودانی و وەزیری نەوت حەیان عەبدولغەنی بانگهێشت دەکات بۆ لێپێچینەوە لە دۆسیەی نەوتی هەرێمی کوردستان، بەتایبەت کە بڕی بەرهەمهێنان لەم کێڵگانە رۆژانە دەگاتە ٢٠٠ هەزار بەرمیل نەوت. بڕێک لەم نەوتە بەقاچاخ دەردەهێنرێ و رۆژانە بەرەو تورکیا دەنێردرێ، ئەوەش دەگوترێ کە پێویستە بەهیچ شێوەیەک هیچ بڕە نەوتێک لە بیرە نەوتەکانی هەرێم دەرنەخرێ.
درێژەی راپۆرتەکەی ئاژانسی مەعلومە لەخوارەوە بخوێنەوە؛
لیژنەی نەوت و سامانە سروشتیەکانی پەرلەمان، بڕیاریدا میوانداری محمد شیاع سودانی سەرۆک وەزیران و حەیان عەبدولغەنی وەزیری نەوت بکرێت، بۆ کردنەوەی دۆسیەی بەقاچاخ بردنی نەوت لەهەرێمی کوردستانەوە.
ئەندامی لیژنەکە باسم ئەلغەریباوی بە ئاژانسی مەعلومەی ڕاگەیاندوە، هەرێم نەوت هەناردە ناکات، بەڵکو بە قاچاخ بەرەو تورکیا دەیبات، ئەمەش بە پێشێلکردنی یاسا و بڕیارەکانی دادگای فیدراڵی و دەسەڵاتی دادوەری و دوورە لە ئیرادەی دەوڵەت و بڕیارەکانی و ڕێکارە فەرمییەکانی”.
ئاماژەی بەوەشکردوە، “تا ئێستا بڕی بەقاچاخ بردراو و دزراو لە هەرێمی کوردستانەوە دیار نییە، بەو پێیەی بەڕێوبەری گشتی نەوتی باکور میوانداری کرا، دووپاتی کردۆتەوە کە کێڵگە نەوتییەکانی هەرێم داخراون و قەدەغەیە هیچ کەسێک بچێتە ناوەوە”.
ڕوونیشیکردۆتەوە، “بەرهەمهێنانی ئەو کێڵگانە لە ڕۆژێکدا دەگاتە 200 هەزار بەرمیل، ئەمەش ئاماژەیە بۆ ئەوەی دەوڵەت هیچ زانیارییەکی لەبارەی بڕی بەرهەمهێنراو، فرۆشراو، یان بە قاچاخ بردن لە هەرێمەوە نییە”.
ئاماژەی بەوەشکرد، “لیژنەی نەوت و سامانە سروشتییەکانی پەرلەمان، پێنج شەممەی داهاتوو میوانداری سەرۆکوەزیران و وەزیری نەوت دەکات بۆ گفتوگۆکردن لەسەر ئەم دۆسیەیە”.
