ئازا پرێس
مەکتەبی سیاسی یەکێتی دوێنێ ٢٤-٩-٢٠٢٤، پەیامێکی توندی بۆ یادی حەوت ساڵەی ریفراندۆمە شکستخواردوەکە راگەیاند، کە ئەوکات سەرکردایەتی یەکێتیش بەشێک بوون لە سەرکردایەتی بەرەی ریفراندۆم. بەڵام ١٦ی ئۆکتۆبەری ٢٠١٧ یەکێتی هەڵوێستی جیاوازی نواند و خۆی نەکرد بەبەشێک لە شکستەکەی ریفراندۆم، بۆیە لە ٢٠١٨ بەدواوە هەر ساڵ لە یادی ریفراندۆم یەکێتی هێرشی توندی سەر پارتی دەکات و بە تاوانباری دەزانێ.
پەیامەکەی ئەمساڵی یەکێتی دیسان لە چەند خاڵێکدا رەخنە و سەرزنشتی جدی تیایە بۆ پارتی، بەشێک لە رەخنەکانی یەکێتی لە پەیامەکەی دا بەمشێوەی خوارەوەیە؛
+سەرەتا بۆ هەلومەرجی ئەنجامدانی ریفراندۆم یەکێتی دەڵێت؛
بە ڕەچاوكردنی هاوسەنگی ئیقلیمی و نێودەوڵەتی، بە خوێندنەوەی وردی هەلومەرجی وڵات و بە هەماهەنگی لەگەڵ دۆستانی گەلەكەمان كە ئامۆژگاری و پێشنیازی دۆستانەیان كردین، لە دۆخێكی باشتری تەبایی و یەكڕیزی ناوخۆییدا، پەیڕەوی كرابا.
+سەبارەت بە لێکەوتەکانی شکستی ریفراندۆم یەکێتی باڵی خۆسەپێنی ناو پارتی تاوانبار دەکا و دەڵێت؛
بەتایبەتیش باڵی سەركردایەتی خۆسەپێن و قۆرخكاری ناو پارتی، شان بداتە بەر ئەركەكانی چارەسەركردنی لێكەوتەكان و ساڕێژی برینەكانی دوای شكست، كەچی بە خیتابی ناڕەوا و نا بەرپرسانەی تەخوین و درز خستنە ریزەكانی گەلەوە، مامەڵەیان لەگەڵ دەرئەنجامە چاوەڕوانكراو و نەخوازراوەكانی پرۆسەی ریفراندۆمدا كرد، بە جۆرێك لە جێبەجێكردنی بەڵێنی سەربەخۆیی پاشگەزبوونەوە و پرۆسەی ریفراندۆمیان كردە دەسكەلای موزایەدەی ناوخۆیی و بە كردەوەش خاكی كوردستانیان، لە ناوچە دابڕاوەكان، بۆ قەدەری كەینوبەینی ژێربەژێر و موساوەمەی نابەرپرسانە بەجێهێشت.
+بێزراوی سەرکردایەتی پارتی و خۆچەماندنەوەیان بۆ هێزە دژبەرەکانی ریفراندۆم یەکێتی دەڵێت؛
لە ئاستی دەرەوە دەستیاندا بە خۆچەماندنەوە و سڕكردنی ئاكامی ریفراندۆمەكە و پاڕانەوە و پێشكەشكردنی سازش لەسەر سازش، لە ئاستی ناوخۆشدا شانازی درۆزنانەی بە ریفراندۆمێكی بێ ئاكامیان، كردە گوتارێكی سیاسیی هەرزان، بێ گوێدانە دەرئەنجامە خراپەكانی دواتر لە كەركوك و ناوچە دابڕاوەكان.
+یەکێتی باسی قوربانی هێزەکانیان دەکات لەکاتی هێرشەکانی سەر ناوچە دابڕاوەکان و رەخنە لە پارتیش دەکات و دەڵێت؛
لە كاتێكدا لایەنی تر لە كۆڕی رووبەرووبونەوەدا هەڵهاتن و لە سەكۆی هاشوهوشی ئیعلامیشدا تۆزی شكستیان بە تەخوین و تۆمەتباركردنی هێزە نیشتمانییەكان داپۆشی و نەیانهێشت هەلومەرجی هەڵسەنگاندنێكی دروست و بابەتی بۆ پرۆسەكە بێتە كایەوە.
+یەکێتی ئەم هەڵبژاردنە بە دەرفەت دەزانێت تاکو دەنگدەرانی هەرێمی کوردستان سزای پارتی بدەن، بۆ ئەوەی باری لاری حکومداری لە کوردستان راستبێتەوە، سەبارەت بە سیاسەتەکانی داهاتووی خۆشیان یەکێتی دەڵێت؛
وەك سەردەمی زێڕینی سەرۆك مام جەلال، سیاسەتی ژیرانەی یەكێتی و دەربەستییە نیشتمانی و نەتەوەییەكانی، پێكەوە لەگەڵ حكومەتی ئیتیحادیدا، بڕیاری دروست لەسەر ئایندەی كوردستان بدات، بە جۆرێك لەسەر دوو پایەی پتەوی باشكردنی ژیان و گوزەرانی خەڵك و پێداگری لەسەر ویستە نەتەوەیی و نیشتمانییەكان و بەگوێرەی ئیستحقاقی دەستووریی خۆمان، پەیوەندییەكی هاوسەنگ و تەندروست لەگەڵ بەغدا بێنێتەكایەوە. دوور لە خیتابی هەڕەشە وگوڕەشەی بێبنەمای سەردەمی ئاهەنگسازی ریفراندۆم و دوور لە خیتابی چەمانەوەیان دوای لێكەوتە شەرمەزارییەكانی راكردنیان لە هەموو بەرەكانی رووبەرووبوونەوە لە ئۆكتۆبەری ساڵی ٢٠١٧ دا.
