ئازا. پرێس
ئاشتی هەورامی وەزیری پێشووی سامانە سروشتییەكانی هەرێمی كوردستان، دەگوترێ دوای نەشتەرگەرییەك كۆچی دوایی كرد. هەورامی لەدایكبووی ساڵ١٩٤٨ بوو، لەساڵی ١٩٧١ لە بەغداد بەکالۆریۆسی لە نەوت بەدەستھێنابوو، دواتر لە کۆمپانیای نەوتی عێراق لە بەسرە وەک ئەندازیار دەستبەكاربوو. دوێنێ ٢٠-١٠-٢٠٢٤ لەتەمەنی ٧٦ ساڵیدا لە دەرەوەی وڵات کۆچی دوای کرد.
پۆستی وەزارەتی سامانە سروشتییەكان لە ٢٠٠٥ەوە بۆ دروستكراوە، لەدوای دروستكردنییەوە ماوەی (١٤) ساڵ ئەم پۆستە بەدەست ئاشتی هەورامییەوە بوو.
هەورامی سەرەتا لەڕێگەی بەرهەم ساڵحەوە لە لەندەنەوە گەڕێنرایەوە بۆ هەرێمی كوردستان‌و پێشنیاز كرا بۆ وەرگرتنی پۆستی وەزارەتی سامانە سروشتییەكان، بەڵام دواتر بوو بە یەكێك لە دۆستە نزیكەكانی نێچیرڤان بارزانی.
تاکو نێچیرڤان بارزانی سەرۆک وەزیران بوو، ئاشتی هەورامی وەزیری سامانە سروشتیەکان بوو، بەهاتنە دەسەڵاتی مەسرور بارزانی لە کابینەی نۆیەم، ئاشتیش پێگەکەی لەقبوو، لەپۆستەکەی دوور خرایەوە. ناوبراو وەزیرێکی بێ شوێن بوو، بۆیە وەک سندوقە رەشەکە وەزارەتەکەی لەناو جانتایەکەی دابوو، لە ئەوروپا ئیدارەی وەزارەتەکەی دەکرد بەتەنها. دواتر کەمال ئەتروشی لەشوێنەکەی دەستبەکاربوو، بەڵام ئەویش لەبەر ناکۆکی لەگەڵ دەزگای پاراستن و کۆمپانیاکانی بنەماڵە، لە پۆستەکەی دوور خرایەوە.
لەسەردەمی ئاشتی هەورامیدا، دۆسیەی نەوتی هەرێمی كوردستان رووبەڕووی ژمارەیەك سكاڵای یاسایی بووەوە، دیارترینیان سكاڵای وەزارەتی نەوتی عێراق لە دادگای ناوبژیوانی نێودەوڵەتی پاریس، سەبارەت بە هەناردەی نەوتی هەرێمی كوردستان بە بۆری نەوتی عێراق- توركیا بۆ بەندەری جەیهانی توركیا. دەرەنجامی ئەم سكاڵایە لە ٢٥ی ئاداری ٢٠٢٣دا بە یەكجاری هەناردەی نەوتی هەرێمی كوردستانی بە بۆریی راگرت.
دیارترین رێككەوتن كە لەسەردەمی وەزارەتەكەی ئاشتی هەورامیدا كرا، رێككەوتنی (٥٠ ساڵە)ی بواری وزە بوو لەنێوان هەرێمی كوردستان‌و توركیا، رێككەوتنێك كە تائێستاش لایەنە سیاسییەكانی رەتیدەكەنەوە ئاگاداری وردەكارییەكەی بن.
گومان لەسەر پەیوەندیەکانی ئاشتی هەورامی هەبوون، چونکە لەدوای رادەستكردنی پۆستی وەزارەتی سامانە سروشتیەکان لە تەمموزی ٢٠١٩دا، ئاشتی هەورامی وەكو یاریدەدەری سەرۆك وەزیران مەسرور بارزانی بۆ ماوەیەك لە شاری لەندەن و لە بینایەكدا لە تەنیشت باڵیۆزخانەی ئیسرائیل‌و لە ناوچەیەكدا لە پشت كۆشكی (باكینگهام)، كارەكانی خۆی بەڕێوە دەبرد، لەو بینایەدا كە هەورامی دەوامی تێدا دەكرد، ژمارەیەك كارمەندی وەزارەتی سامانە سروشتیەكانیش هەبوون لەگەڵ راوێژكارێك بەناوی (مایكڵ هاوەرد) كە مانگانە بڕی (٤٠ هەزار) دۆلار مووچەی وەردەگرت، ئەوكات ئاشتی هەورامی بە تەلەفۆن لەگەڵ بەرپرسانی حكومەت قسەی دەكرد، جارێكیش بەشێوەی “ئۆنلاین” بەشداری لە كۆبونەوەی حكومەتدا كردوە.
ئاشتی هەورامی کە دوێنێ هەواڵی مردنەکەی بڵاو بۆتەوە، دەگوترێ بە هۆی نەشتەرگەری بووە، بەڵام بەهۆی پەیوەندیە زۆر و ئاڵۆزەکانی، هەروەها ناکۆکی بەردەوامی لەگەڵ مەسرور بارزانی، بۆیە چاودێران گومان لە مردنەکەی دەکەن.
تائێستا تەنها سەرۆکی هەرێم سەرەخۆشی لە خانەوادەی ئاشتی هەورامی کردووە، دیار نییە سەرۆکی حکومەتی ماوەبەسەرچوو سەرخۆشی لە خانەوادەکەی دەکات یان نا؟؟
