جووتیار ڕەشید
لەدوای ڕوخانی سەدامەوە گەلانی عێراق و هەرێم گیریانخواردوە بەدەست نەوەیەک لە سیاسی-دەسەڵاتخوازەوە کە پەروەردەی یەک قوتابخانەی حیزبی دەسەڵاتخوازی – نادەوڵەتی خۆپەرستن،بنەماڵە پەرست،مەزهەب پەرست…..هەموو شتێک دەپەرستن،هەموو شتێک بۆیان گرنگە جگە لە نیشتیمان و گەل نەبێ،ئەم نەوەیە لە سیاسی دەسەڵاتخواز، پیاو و ژنی هەموو ئەرکێکن جگە لە دەوڵەتداری و نەتەوەسازی.
گەل،دەستور و یاسا بەدەست ئەم نەوەیە لەسیاسیەوە بوەتە تۆپ و نیشتیمان گۆڕەپانی تۆپ تۆپێنی بێ حەکەم و یاسا.
ئەم نەوەیە لە سیاسی پیلانگێڕی بێ ڕکابەرن لەگەل و وڵاتی خۆیان،22 ساڵە ئیدارەی ناکۆکیە ناوخۆییەکانی نێوان هەرێم و بەغدا و ناکۆکیە مەزهەبی و حیزبیەکانی ناوخۆیان دەدەن نەک لە ڕێگای دەستور و یاساوە چارەسەریان بکەن.
هەروەک لەسەرەتا ئاماژەم بۆکرد ئەم نەوەیە پیاو و ژنی دەوڵەداری و چارەسەر نین بەڵکو جۆرێک لە بوکەڵەی پڕۆژە و بەرژەوەندیە هەرێمی و جیهانیەکانن لەپای دەستپێوەگرتن و بەپێوەمانەوەی خۆیان و پێگە و بنەماڵە و دەسەڵات و بەرژەوەندیەکانیان.
22 ساڵە ئەم نەوەیە لە دەسەڵاتداری بەغدا و هەرێم نەک هەر کێشەیەکی نێوان هەرێم و بەغدایان بەپێی دەستور چارەسەر نەکردوە بەڵکو کێشەکانیان ئاڵۆزترکردوە،ئەوەش بەشێکە لە پیلان و زهنیەتی دەسەڵاتدارانی هەردوولا،بۆیە هیچ باشەیەک نە بۆ خەڵکی هەرێم و نە بۆ گەلانی عێراق لەسەردانەکەی سودانی بۆ هەرێم چاوەڕێ ناکەم.
بەڵام
لەو پێناسەی سەرەوەوە هەڵسەنگاندێک بۆ سەردانەکەی دەکەم:-
دەسەڵاتدارانی بەغدا و هەرێم لەدوای ڕوخانی سەدامەوە بونەتە مەنجەڵ و سەرقاپی بەرژەوەندی گۆڕینەوە و یەکترپاراستن لەسەرحسابی گەلانی عێراق و هەرێم و سودانیش یەکێکە لەو سیاسیە دەسەڵاتخوازانە.
سودانی بۆ چارەسەری هیچ کێشەیەک نەهاتوەتە هەرێم چونکە لە پرۆتۆکۆلی نێوان سەرانی دوو لایەندا کاتێک سەرانی ئەو دوو لایەنە یەکتردەبینن کە هەموو شتێک بڕابێتەوە و ئەوان ئیمزای کۆتایی لەسەردەکەن و ڕێکەوتنەکان ڕادەگەیەندرێن.
کام لە کێشەکانی نێوان هەرێم و بەغدا گەیشتونەتە ئەنجام هەتا سودانی بێت و ئیمزایان لەسەر بکا؟!
دواتر بۆلە ئێستادا کە حکومەتی هەرێم حکومەتێکی کاربەڕێکەرە وبە پێی یاسا دەسەڵاتی لە کاروباری ڕۆژانەی هەرێم تێناپەڕێ،لە لایەکی تریشەوە هەڵبژاردن کراوە و بەپێی یاسا دەبێ لە ماوەیەکی کورتی داهاتودا کابینەی نوێی حکومەت پێکبهێنرێ ؟!
سودانی بۆ چارەسەری کێشەکان نەهاتوە بەڵکو بۆ ئیدارەدانی کێشەکان هاتوە هەتا نزیکبونەوەی هەڵبژاردنی عێراق و چاوی لەسەر پشتگیری بارزانیە بۆکابینەی داهاتوی حکومەتی عێراق و پیی وایە بە پشتگیری بارزانی پشتگیری هەرێم و بەشێک لە پشتگیری هیزە هەرێمیەکان مسۆگەردەکات.
سودانی هاوکاری دەسەڵاتدارانی هەرێمی کردوە لەو دیزانی هەڵبژاردنەی پارلەمانی کوردستان کە باس و خواسێکی گەرمی لەسەرکرا،ئێستا هاتوە چاکەکەی لەگەڵ دەسەڵاتدارانی هەرێم تەواو بکا و هاوکاریان بکا لە پێکهێنانی کابینەی حکومەتی هەرێمی داهاتوو.
بۆ ئەوەی لە هەڵبژاردنی پارلەمانی عێراق و پێکهێنانی کابینەی داهاتووی حکومەتی عێراق پێیان بڵێ (هل جزاء الاحسان الا الاحسان).
سودانی لەدوای بڕیارەکەی دادگای فیدرالی موچەی موجەخۆرانی هەرێمی بەبارمتە گرتوە و وەک بەرتیل بەرامبەر دەسەڵاتدارانی هەرێم بەکاریدێنێ بۆ بەرژروەندی کەسی خۆی.
لە کۆتاییدا ئەوەماوە بڵێم سودانی لاوازبوونی پێگەی کەسی خۆی لە بەغدا بە هاوپەیمانی لەگەڵ دەسەڵاتدارانی هەرێم قەرەبوو دەکاتەوە،هەرئەوەش هۆکاری سەردانە بەردەوام و بێ هۆکارەکانیەتی بۆ هەرێم.
ئەم وتارە راو و بۆچوونی نووسەر خۆیەتی
