ئازا پرێس
لە راگەیەندراوێكدا پۆلیسی دارستان و ژینگەی سلێمانی ئاشكرایكرد، كەسێكیان بە تۆمەتی راوكردنی بزنە كێوییەك لە شاخی بەرانان دەستگیركردوە و دەستیشیان بەسەر چەك و كەرەستەی راوەكەیدا گرتووە.
ئاماژەبەوەکراوە، بەهۆی بەڕێوەچوونی سەرژمێرییەوە؛ بڕیاربوو تەواوی هاووڵاتیان لە ماڵەكانیان بمێننەوە، بەڵام هاووڵاتییەك بەوپەڕی هەستنەكردن بە بەرپرسیارێتی ڕووی لە چیای بەرانان كردوە و ئێوارەی دوێنێ ٢٠ی ئەم مانگە كە یەكەم رۆژ دەستپێكی سەرژمێرییەكە بزنێكی كێویی كوشتوە.
لە راگەیەندراوەکەدا روونیشكراوەتەوە، سەرەڕای سەختی ناوچە شاخاوییەكان و دۆزینەوەی تۆمەتبار ئاسان نەبووە، بەڵام دوای گەڕانێكی زۆر توانرا لەلایەن مەفرەزە هاوبەشەكانی پۆلیسی دارستانی دەربەندیخان و بنكەی باوەخۆشێن تۆمەتبار دەستگیر بکرێت.
چاودێرانی ژینگەیەوە لەوبارەیەوە دەڵێن، سەرەڕای قەدغەی راوکردن و کەمبوونی ئاژەڵە کێویەکان لە کوردستان، بەڵام هێشتا لەلایەن زۆر کەسەوە وەک سامانێکی نێستمانی و هاوسەنگی ژینگەی و جوانی سروشت نابینرێ، بۆیە بەبێ هۆ ئاژەڵە کێویەکان دەکوژن.
