ئارام حاجی
تاکو ڕوخانی ڕژێمی بەشار
ئەو فۆڕمەی تورکیا
کە لەسوریادا بوونی هەبوو
فۆڕمێکی ئیحتکاریی میلیتاری سەوریی و
تەوزیفکردنەوەی بوو
لە بەناو دژایەتی ترۆردا
لە دژی ڕابوونی کورد لەسوریاو
داگیرکاری خودی سوریادا
دوای ڕوخانی ڕژێمەکەی بەشاریش
دوو فۆڕمی دیکەی تورکی لەسوریادا بەرجەستەبوو
یەکەمیان
تورکیایەک کە خاوەنی ڕەوتی پەڕگیری هەتەشەیی ڕوخێنەری ڕژێمەکەی بەشارە
بارگاوی بە دوو ڕێککەوتنی ستراتیژی دژبەردا
کە یەکەمیان
ڕێککەوتنی تورکی ئەمریکی ئیسرائیلییە و
دووەمییان
ڕێککەوتنی تورکی ڕوسی ئێرانییە
دووەمیشیان
فۆڕمێکی تورکی داگیرکەری شامە
وەک ولایەتێکی عوسمانی نوێ
کە خەلیفەکەی خەون بە نوێژی فەتحەوە دەبینێت
لە مزگەوتی ئومەوی دیمەشق
وەک بەشێک لە مێژووی ئیمپراتۆرییەتی عوسمانی داڕماوی سەدەی ڕابردوو
هەموو ئەم فۆڕمە تورکییانە پێکەوە
لەدوای هاتنەکایەی حکومەتێکی ئینتیقالی هەتەشەیی
دەرگیرە لەگەڵ ئەو حەقیقەتەی
کە تورکیا بەتەنها ناتوانێت خاوەندارێتی تاکڕەوانە لە سوریا بکات
هەربۆیە خەلیفەی عوسمانیزمی نوێ
تا ئێستا نەیتوانیوە ئەو نوێژی فەتحەی
کە خەونی لەمێژینەیەتی
لە مزگەوتی ئومەوی دیمەشق بکات
چونکە باشدەزانێت
کە نە ستراتیژی خۆرئاوایی ئەوەی لێ قەبوڵدەکات
نە ستراتیژی عەرەبی کە سوریا وابەستەیەکی ناسیونالیزمی ڕیشەداری پێوەی هەیەو
نە ئێران و
نە ڕوسیاش
ئەمە جگەلەوەی
ئەم تێکئاڵانە فرە فۆڕمییەی تورکیا لەسوریادا
لەتوانایدا نییە لەڕووی سیاسییەوە ئەوە بۆ ئاکەپە مسۆگەرکات
کە زامنی بردنەوەی بکات لەهەڵبژاردنی داهاتووی تورکیاو مانەوەی ئەردۆگانیش بەسەرۆک
گەرچی وەزیری دەرەوەی تورکیاو
سەرۆکی دەزگای موخابەراتەکەشی
بەهەموو توانایەکیانەوە
لە نێوەندی سیاسەتی دیمەشقی
دوای بەشاردا
بوونیان هەبووەو هەیە!
هەموو ئەمانە وادەکات
کە تورکیا لە خۆی بپرسێت:
ئەمەمان بۆکردو
چیمان لەمە دەوێت و
بوونی ئێمە لەسوریادا
دەبێت لە کام لەم فۆڕمانەبێت
یان
لەدەرەوەی ئەمانە ئاخۆ چ فۆڕمێکی دیکە هەیە
پەنای پێبگرین
کە خاوەندارێتی و پاراستنی بەرژەوەندییەکانی ئێمە لەسوریادا مسۆگەر بکات؟!
بۆ وەڵامدانەوەی ئەم پرسیارانە
تورکیا ناچار بە گەڕییانی گفتوگۆو سەردانی دبلۆماسی و سیاسی و ستراتیژی بووە
لەگەڵ جەمسەرە پەیوەستتدارەکان بە ئایندەی سیاسی و ستراتیژی سوریاوەو
گەر ئاکامەکانی
دەستەبەرکردنێکی هاوسەنگی بەرژەوەندییە سیاسیی و ستراتیژییەکانی
ئەم جەمسەرانە لەخۆنەگرێت
ئەوا نەک تورکیا سەرکەوتوو نابێت لە تاکڕەوانە حوکمکردن بە ئایندەی سوریاوە
بەڵکو ئەوجەمسەرە ناوخۆییانەی ناو سوریاش
لەدەست دەدات
کە ئامرازی بەدەستهێنانی ڕوخانی ڕژێمی پێشوو
ئێستای بەرجەستەبوونی نفوزی تورکیشە
لەسوریادا
ئەمەش ئەو دۆخەیە
کە تورکیای وێڵو سەرگەردانکردووە
لە بەخشینی شوناسێکی تورکی بەسوریای دوای بەشار
بەتایبەت لە واقعێکدا
کە ئەتمۆسفیری سیاسی و ستراتیژی سوری
چ لەسەر ئاستی هێزولایەنە سەورییە چەکدارییەکەی
چ لەسەرئاستی خواستی جەماوەرییە فرە پێکهاتەییەکەی
تەواو لەو ئەتمۆسفیرە سیاسییە ستراتیژییە تورکییە
جیاوازە
کە تورکیا لەپێناویدا
لەدووی فۆڕمێک وێڵە
بۆ نەخشاندنی لەسوریادا
