سیروان کەلاری
حکومەتی هەرێمی کوردستان ۲۲ ساڵ چاوەڕێی کرد، هەتا لە ساڵی ۲۰۱٤ و بەپەلەپروسکێ ۳ ڕۆژ بەر یادی لە کیمیاباران هەڵەبجەی شەهید کرا بە مەرکەزی پارێزگا، وەلێ نەوەک بە ئیرادەی سەری ڕەش و هەولێر بەڵکو ئەوە بە ئیرادە و فشاری بەغدا و خودی نوری مالیکی بوو.
ئەمساڵ ۲۰۲٥ کابینە بەسەرچووەکەی مەسرور مەسعود مستەفا لە حکومەتی هەرێم دیسان ڕووی وەک بنی مەنجەڵی میس رەشبووە و ڕووبەڕووی سکانداڵێکی تری میدیایی بوونەتەوە، لەکاتێکدا حکومەتی فیدراڵی و بەغداد، کە بە وتەی میدیا زوڕناژەنەکانی ئەوان بە داگیرکەر و دوژمنی سەروەری و ئاڵای کوردستان و ئەم شتانەی دەزانن، ڕۆژی ۱٦ی ئاداری ئەمساڵ بەبۆنەی کیمیابارانی هەڵەبجەوە دەکەن بە پشووی فەرمی لە تەواوی ئێراق بەڵام ئەو پشووە هەرێمی کوردستان و خودی پارێزگای هەڵەبجەش ناگرێتەوە. ئەوەش دیارە بە فەرمانی مەسرور بارزانی ماوەبەسەرچووە، کە تەنیا بەوە دەست هەڵناگرێت موچەی موچەخۆرانی پارێزگای هەڵەبجە و هەرێمی کوردستان بدزێت، بەڵکو ئیهانەش بە مەزار و خوێنی شەهیدانی جینۆسایدی هەڵەبجەش دەکات. ڕۆژی ۱٦ی ئادار لە هەرێمی کوردستان ئەگەر چی وەک بۆنەیەکی فەرمی ناسێنراوە “کە مرۆڤ تێناگات ئەوە واتای چییە!)، بەڵام پشووی فەرمی نیە و ئەوەش لەکاتێکدایە ڕۆژی لەدایکبوونی مستەفا بارزانی لە هەرێمی کوردستان کراوە بە پشووی فەرمی!
جگەلەوە برادەرانی کوردایەتی هەولێر کە وشەی نەشیاو نەماوە لە تەخوینکردنی نەیار و ڕکابەرەکانی سەری ڕەش و بنەماڵەی بارزانی بەکاری نەبەن و هەرکەس هەستایە سەرپێ، ئەوان بە جاشسیغە و دوژمنی کوردستان و ئاڵای “پیرۆز”ی کوردستان و جاشی حەشدی شەعبی و بەرەی مقاوەمە لەقەڵەمیان دا، بەڵام تەنانەت ڕۆژی عاشوراشیان کردووە بە پشوو و وەلێ جینۆسایدی هەڵەبجە بە لائیقی پشوو نازانن، چونکە دەنگدەرانی هەڵەبجە وادیارە پارتی و بنەماڵەی بارزانی هەڵنابژێرن و نابێژن؛ ئەز خوڵامێتەمە !
ئەمەی لای خشتەی پشووە فەرمییەکانی حکومەتی هەرێمی کوردستانە (بەگوێرەی ماڵپەڕی حکومەتی هەرێم) کە ۳٤ ساڵە لەبن ڕکێفی بنەمالە ئالبارزاندایە :
ڕۆژانی پشووە فەرمییەکان
- ١/١ : سەری ساڵی زایینی
- ٣/٥: ڕۆژی دەستپێکردنی ڕاپەڕینی گەلی کوردستان
- ٣/١١: یادی ڕاگەیاندنی ڕێکەوتننامەی ١١ی ئاداری ١٩٧٠
- ٣/١٤: ڕۆژی لەدایكبوونی بارزانی نەمر
- ٢١-٢٣/ ٣: جەژنی نەورۆز
- ٣/٣٠ – ١/ ٤: جەژنی ڕەمەزانی پیرۆز*
- ٤/١ : جەژنی ئەکیتۆ
- ٤/٩: ڕۆژی ڕوخانی ڕژێمی بەعس و ئازادکردنی عێراق
- ٤/١٦: سەری ساڵی ئێزدییەکان(جەژنی سووری ئێزدییەکان)
- ٥/١: ڕۆژی کرێکارانی جیهان
- ٦-٩/ ٦: جەژنی قوربانی پیرۆز*
- ٦/٢٦: سەری ساڵی کۆچی*
- ٧/٥: ڕۆژی عاشورا*
- ٧/١٤: شۆڕشی (١٤) ی تەمووزی ١٩٥٨
- ٩/٥ یادی لەدایكبوونی پێغەمبەری مەزن (د.خ)*
- ١٢/٢٥: یادی لەدایكبوونی حەزرەتی مەسیح (د.خ)
*بە پشتبەستن بە ڕۆژژمێری کۆچی، ڕۆژەکان مەزندەکراوە
