شێرزاد شێخانی
هیچ مەنتقی تێدایە نیە ئەتوو بەدەبابەی بەعس هەولێرت داگییر کردبی ، ئێستا بێی باسی خاوەندارێتی هەولێرم لۆ بکەی ؟!. سەیرە ئەو هەموو گەڕەکە دێرینانەی هەولێرت کاولکردبی ، خەرکە ڕەسەنەکەت دەربەدەر کردبی ، هەرچی جوانی ئەو شارە هەیە لەناوت بردبی ئەوجا سەرباری هەموو ئەو تاوانەش بێی باسی موڵکداری هەولێر بکەی کە بە عارەب وتورک وعەجەم سیمات گۆڕیبی ؟!.
هەولێر هەشت هەزار سارە خاوەنی خۆی هەبووە . خاوەنی هەولێر خەرکی قەراتو تەیراوەو خانەقاو تەعجیل و کوران وسەیداوەو سێتاقان و بەستەپیازەو باداوەو ئیسکان و زانیاری و سەعدوناوەو شۆڕش و ئازادی و شورتاوەو گێمەدێ و پۆتیناوەو گلکەندن . ئەوانە خاوەنی راستەقیینەی هەولێرو مییراتگری عەشتارو سوڵتان مزەفەرو کوچک مەلان .
خاوەنی هەولێر مەلا فەندی ورەشاد موفتی و عەتاوڵا ئاغاو مستەفا عوزێری و حەمەدەمین ئاغاو حاکم رەشید عبدالقادر و ئەحمەد چەلەبی و جەلیل خەیات و بەشیر کۆکاو حاجی نامیق وجەودەت ئەحمەد ناجی و جەمال شەشخان و عزەدین فەیزی و موسا سەبزەچی و شێخ کەمال بەرزەنجی و عومەر چەلەبی و جەلال خەلیل و کەریم شێخ عەلی و پیرباڵ قەساب و شێمە قەساب و سەعید دامرچی و کەمال عەیشێ و حاجی کانەبی و عەبۆ و ئەمین قاوەچی و سەید سەلیم و حاجی مستیل حاجی شەوقی ومحیەدین بەقاڵ و دکتۆر مستەفا العالم و تەحسین چیچۆ و تەلعەت موشیر ئاغاو نازم یونس و هاشم عەبدوڵڵاو نەوەکانی ئەو پیاوە ناسراوو نازدارانەی هەولێرن .
ئەوانە خاوەنی راستەقیینەی هەولێرن نەوەک ئەوانەی پێش دەبابەکانی بەعس کەوتن و ئەو شارەیان داگییر کردو خەرکە ڕەسەنەکانیان بەدەبەخت و فەرامۆشکرد و ، کەسانەکیان هێناو کردیانە حاکمی شار کە هەتا دونێ کەس نەیدەزانی کوڕی کێن وبابو باپیرانیشیان نامۆ بوون بەو شارە .
هەولێر هی هەولێرییانە ، هەر دەبی بگەڕێتەوە باوەشی خاوەنە راستەقیینەکەی خۆیەوە کە هەولێرییە ڕەسەن و نەجیبزادەکانن. باقی وەلسەلام .
ئەل وتارە راو و بۆچوونی نووسەر خۆیەتی
