ئازا پرێس
پێش ئەوەی کۆبوونەوەی نەتەوە یەگرتووەکان دەستپێبکات، لێدوانی دڵنیاکەرەوە دەدرێن سەبارەت بە چارەنووسی مانەوەی هێزەکانی ئەمریکا لە عێراق. بڕیار وایە تا ٢٠٢٦ سەرجەم هێزەکانی ئەمریکا بەغدا و هەولێر جێبەهێڵن.
لە راگەیاندنێکیدا وەزارەتی بەرگریی ئەمریكا(پنتاگۆن)دەڵێت:
پێشبینی دەكرێت هەفتەی داهاتوو بڕیاری كۆتایی لە چارەنوسی ئەركی هاوپەیمانیی نێودەوڵەتیی دژی داعش لە عێراق بدرێت. پێشبینی دەكرێت هەفتەی داهاتوو بە فەرمی بڕیارەكە رابگەیەندرێت و ئەركی هاوپەیمانیەكە لە سەربازییەوە بۆ هاوبەشیەكی ئەمنی دووقۆڵی بگۆڕێت.
مانەوەی ئەمریكیەكان لە عێراق بۆ سەقامگیریی تەواوی ناوچەكە گرنگە.
هاوبەشیە دوو قۆڵیە نوێیەكەی نێوان ئەمریكا و عێراق گرنگی دەدات بە ئاڵنگارییە ئەمنیەكان و هەژمونی میلیشیاكانی عێراق، كە لەلایەن ئێرانەوە پاڵپشتی دەكرێن.
هەر سەبارەت هەمان بابەت رۆژنامەیەکی ئەمریکیش رایگەیاند:
ئەمریکا هێزەکانی لە بەغدا و هەولێر دەکشێنێتەوە
ڕۆژنامەی وۆڵستریت جۆرناڵ-ی ئەمریکی ئاشکرایکردووە، لەدوای ساڵی ٢٠٢٦ هێزێكی بچوكی ئەمریكا لەعێراق دەمێنێتەوە، ئەو هێزەش بە سیفەتی ڕاوێژكار و پشتیوانیكردنی هێزەكانی ئەمریكا لەسوریا دەبێت.
ئاماژە بەوەشدراوە، سەدان سەربازی ئەمریكی لە هێزەكانی هاوپەیمانی نێودەوڵەتی، لەمانگی تشرینی دووەمی ساڵی ٢٠٢٥ لە عێراق دەكشێنەوە، بە دوایدا لە كۆتایی ساڵی ٢٠٢٦ هێزەكانی ئەمریكا لە هەولێر دەكشێنەوە.
رۆژنامەكە لەزاری ژمارەیەک بەرپرسی ئەمریكاوە بڵاویكردووەتەوە: ویلایەتە یەكگرتووەكان و عێراق گەیشتووەنەتە رێككەوتن، هەفتەی داهاتوو رادەگەیەنرێت، بۆ كشانەوە سەدان سەربازی ئەمریكی و بیانی تر لە عێراق، هەروەها بەرپرسێكی باڵای ئیدارەی ئەمریكا رایگەیاندووە، هێڵە گشتیەكانی پلانی كشانەوەكە تەواوبووە، بەڵام هەندێک وردەكاری ماوە پێویستی بە چارەسەركردن هەیە، بەتایبەت لەگەڵ هەندێک لە وڵاتانی تر لە هاوپەیمانی نێودەوڵەتی.
دوێنێ مەحمەد شیاع سودانی بەڕێکەوت بەرەو ئەمریکا بۆ بەشداربوون لە کۆبوونەوەی ساڵانەی نەتەوە یەکگرتووەکان لە نیويۆرک، لەهەمان رۆژدا دوو لێدوان سەبارەت بەکشانەوەی هێزەکانی ئەمریکا لە عێراق مایەیی سەرنجە، وەک دڵنیا کردنەوەی عێراق لێکدەدرێتەوە.
