ئازا پرێس
محەمەد حەلبوسی، سەرۆكی لەكارلادراوی پەرلەمانی عێراق جەختی لەوە کردەوە کە داوای لەكارخستنی شاخەوان عەبدوڵا، جێگری دووەمی سەرۆكی پەرلەمانمان كردووە و دەڵیت” ئێرە هەولێر نییە رێگە لەسەرۆكی پەرلەمان بگرن بچێتە شارەكە”.
محەمەد حەلبوسی، سەرۆكی لەكارلادراوی پەرلەمانی عێراق جەختی لەوە کردەوە کە داوای لەكارخستنی شاخەوان عەبدوڵا، جێگری دووەمی سەرۆكی پەرلەمانمان كردووە و دەڵێت” بەهۆی بەكارهێنانی پێگەكەی بۆ سەپاندنی ئیرادەی سیاسی بەسەر ئەنجومەندا، بەوە پێشێلی مەرجەكانی پێگەی كردووە، كاتێك پاسەوانەكانی بەكاربهێناوە بۆ دەستدرێژیكردنە سەر پەرلەمانتاران، ئەوە پێشهاتێكی مەترسیدارە لە ئەنجومەنی نوێنەران.”
حەلبوسی، ئاماژەی بەوەكردووە” نابێت پاسەوانی شەخسی بچێتە ناو دانیشتنەكانی پەرلەمان، پێویستە پاسەوانەكانی ئەنجومەن ئامادەبن بۆ پاراستنی ئارامی دانیشتنەكان، نەك پاسەوانەكانی شەخسی، جارێك ئەوەیان كرد لە هەولێر كاتێك رێگەیان لە سەرۆكی پەرلەمان گرت بچێتە ناو شارەكە، ئێرە بەغدادە جیاوازە”.
ئەو لێدوانەی م.حەلبوسی لەکاتێکدایە کە دوو رۆژ پێش ئەمڕۆ لەکاتی ئاڵۆزی نێوان پەرلەمانتارانی کورد و لایەنە سونییەکان، پاسەوانانی شاخەوان عەبدوڵا بەچەکەوە چووبوونە ناو هۆڵی پەرلەمان و دەستوەردانی دۆخەکەیان کردبوو.
جێگەی ئاماژەیە دەمێکە م.حەلبوسی کەوەک هاوپەیمانی ستراتیژی پارتی بەناودەکرا، بەڵام لێیان هەڵگەڕاوەتەوە، ئەمە دووەمین هەڵوێستی توندیەتی بەرانبەر دەسەڵاتدارانی پارتی.
