ئازا پرێس
دوێنێ رەوتی هەڵوێستی نیشتمانی بەجیا بە لێدوانێک رایگەیاند کە تانەی فەرمی خۆی لە ئەنجامی هەڵبژاردنەکان داوە، ئەمڕۆکەش هەر بۆ هەمان مەبەست دوو لایەنیتری ناڕازی کۆمەڵی دادگەری و بەرەی گەل سەرۆکەکانیان کۆبوونەوەو ئەوانیش بەلێدوانێک بۆ رای گشتی گوتیان ساختەکاری لە هەڵبژاردنەکانی ٢٠-١٠-٢٠٢٤ دا کراوەو پێشینە دیزاین کراو بووە.
سەرەتا راگەێنراوی رەوتی هەڵوێست ببینە؛
دوێنێ ڕەوتی هەڵوێستی نیشتمانی، تانەی فەرمی خۆی لەسەر هەڵبژاردنەکانی خولی شەشەمی پەرلەمانی کوردستان پێشکەشکرد.
لەتانەکەدا بەوردی هەموو بوارەکانی خروقات و ساختەکاری خراوەتەڕوو، دەیان لایەنی کێشەی هەڵبژاردنەکان لە ڕووی یاسای و تەکنیکیەوە خراوەتەڕوو.
بەدەر لە ساختەکاریەکان؛ (٢١٠ هەزار دەنگ ) سوتێندراوە، زیاتر لە (١٠٠ هەزار کەس) بەبیانوی پەنجەمۆر بێبەشکراون لە دەنگدان… تەنیا ئەمە (١٥ کورسی پەرلەمانە)
چەندین وردەکاری پەیوەست بە ساختەکاری و
پێشێلکارییەکان بۆ دەستەی دادوەری هەڵبژاردنەکان ڕوونکراوەتەوە.
ڕەوتی هەڵوێست پێشترو لەم سکاڵایەشدا داوای (سۆفتوێری) کردوە بۆ سەلماندنی ساختەکاری و گۆڕینی ئەنجام، بەبیانوی ئەوەی لای کۆمپانیای کۆریە؛ نەدراوە…
لەکۆتاییشدا داواکاری رەوتی هەڵوێست، بۆ راستکردنەوەی رێکارەکانی هەڵبژاردن لەکوردستان و عیراقدا باسکراوە، داوای لێکۆڵینەوەی وردی یاسایی و تەکنیکی کردوە… بۆ سەلماندنی ساختەکاری، پاش سەلماندن پێویستە هەڵبژاردنەکانی خولی شەشەمی پەرلەمانی کوردستان هەڵبوەشێنرێتەوە.
هەر بۆ مەبەستی ئەنجامەکانی هەڵبژاردن و پرسی بەشداربوون و نەبوونی پەرلەمان و حکومەت لاهور شێخ جەنگی و عەلی باپیر کۆبوونەوە گوتیان؛ دوپاتی دەكەینەوە هەڵبژاردنی ٢٠ ی تشرینیبدووەم ساختەكاری و دیزایینكراوە
لاهور شێخ جەنگی سەرۆكی بەرەی گەل و عەلی باپیر سەرۆكی كۆمەڵی دادگەری لە بارەگای بەرەی گەل لە هەولێر کۆبوونەوە، لەکۆبوونەوەکەیان ئاماژەیان بەچەند خاڵێک کردووە، لەوانە؛
– پێویستە تانەی لایەنە سیاسییە بەشداربوەکانی ئەم هەڵبژاردنە لەبەرچاو بگیرێ، جەختیشمان کردەوە لەسەر ئەو ڕاستییەی کە تێپەڕبوونی هەڵبژاردنەکانی ٢٠ ی تشرینی دووەم بەو هەموو ساختەکارییەوە پرسیاری جدی لەسەر کۆمسیۆنی هەڵبژاردنەکان و شەرعییەت و مەشروعییەتی پرۆسەی سیاسی دروست دەکات و متمانەی خەڵک بە دامەزراوە نیشتیمانییەکان هێندەی تر لاواز دەکات.
– ئەو ساختەکاریی و دیزاینەی بۆ هەڵبژاردنەکانی هەرێم کراوە گوزارشتە لە شکستی حوکمڕانیی و ترسی حزبەکانی دەسەڵات لە سەنگی راستەقینەی خۆیان هەر بۆیە لە هەموو هەڵبژاردنێکدا و هەر جارە و بە مۆدێل و رێکارێک پەنا بۆ ساختەکردنی ئیرادەی هاوڵاتیانی هەرێمی کوردستان دەبەن.
جێگەی ئاماژەیە لەلایەک لایەنەکان شاند پێکدێنن بۆ پێکهێنانی کابینەی دەیەمی حکومەت، لەلایەکیتریش هەندێک لایەن دەیانەوێ بەتانە و سکاڵاکانیان ئەنجامی هەڵبژاردنەکان بگۆڕن کە کارێکی سەختە یان بتوانن بە دەنگدەرانیان بڵێن کە ئێمە هەروا بەئاسانی بەو ئەنجامانە رازی نابین.
