ئازاپرێس
د. سیروان محەممەد، بریکاری وەزارەتی پلاندانانی حکومەتی هەرێمی کوردستان، ئەمڕۆ رایگەیاند کە حکومەتی عێراقی لەبارەی پرسێک تایبەت بە هەرێمی کوردستان بڕیار دەدات.
بریکاری وەزارەتی پلاندانان گوتی “یەکێک لە تەوەرەکانی کۆبوونەوەکەی ئەمڕۆی ئەنجوومەنی وەزیرانی عێراق تایبەت دەبێت بە تێبینییەکانی حکوومەتی هەرێم لەبارەی پرۆسەی سەرژمێریی لە کەرکوک و ناوچە کوردستانییەکانی دیکە.”
وەک د.سیروان ئاماژەی پێکردووە، حکومەتی هەرێمی کوردستان دەیەوێت لە پرۆسەی سەرژمێریدا، ئەو هاووڵاتییە عەرەب یان تورکمانانەی بەهۆی ئاوارەبوون یان هەر هۆیەکی دیکە، ئێستا لە هەرێمی کوردستان یان ناوچە کوردستانییەکانی دیکە دەژین، لە پرۆسەی سەرژمێریی دانیشتوواندا وەکو نیشتەجێى ناوچەى ئێستەیان تۆمار نەکرێن، بەڵکو لەسەر ناوچە ڕەسەنەکانی خۆیان تۆمار بکرێن.”
بڕیارە ڕۆژی ٢٠ـی تشرینی دووەمی ئەم ساڵ سەرژمێریی گشتی لە عێراق، هەرێمی کوردستان و ناوچە دابڕاوەکان بکرێت. سەرژمێری لە عێراق لە ساڵی ١٩٥٧ وە نەکراوە، بەڵکو زۆرتر ژمارەی دانیشتوان لە رێگەی کارتی بریکارەکانی خۆراک بەبنەما وەرگیردراوە.
