ئازا پرێس
بەپێی هەواڵێکی پێگەی ۹٦٤ ئەو سێ کەسەى بە تۆمەتى سووتاندنى بازاڕەکانى هەولێر و دهۆک و کەرکوک دەستگیرکرابوون، لەلایەن دادگاى رەسافەوە بڕیارى ئازادکردنیان بۆ دەرچوو.
بەپێى نوسراوێکى فەرمى سەرۆکایەتى دادگاى تێهەڵچوونەوەى رەسافە کە بەروارى ئەمڕۆ سێشەممە٥-١١-٢٠٢٤ لەسەرە پێگەکە بڵاویکردۆتەوە، تێیدا هاتووە کە بەهۆى نەبوونى بەڵگە لەسەریان، پێویستە هەرسێ تۆمەتبار، هونەر فەخرەدین و محەمەد نەجات و سیروان حوسێن، بە زوترین کات ئازاد بکرێن.
ئەو کەسانە تۆمەتبارکرابوون بە سووتاندنى بازاڕى قەیسەر و لەنگەى هەولێر و بازاڕەکەى کەرکوک و بازاڕى چەلێى دهۆک.
بەپێى بڕیارەکەى ئەمڕۆی دادگا، پێویستە، دوای ئازادکردنیان ئەو چەک و ئۆتۆمبێلەى لەکاتى دەستگیرکردنیاندا دەستى بەسەرداگیراوە، پێیان بدرێتەوە.
پێویستە بگوترێت رۆژى ١-٧-٢٠٢٤، هەردوو وەزارەتى ناوخۆى عێراق و هەرێمی کوردستان، لە بارەى ئاشکراکردنى ئەو کەسانەى لە پشت سووتاندنى بازاڕەکانى هەولێر و دهۆک و کەرکوکەوە بوون، کۆنگرەیەکى رۆژنامەوانیى هاوبەشیان ئەنجام دا و جەختکرایەوە کە بکەرانى ئەو ئاگرانە، گرووپێکى سەر بە یەکێتین و لەلایەن پەکەکەوە هاوکاری کراون.
