ئازا پرێس
لەماوەی مانگێک دوو خولی سەربازی لەهەردوو ئەکادیمیای زاخۆ و قەلاچوالان وەک ئەفسەر خوێندنیان تەواو کرد، ئەفسەر هەیە بەڵام سوپا نییە.
دەرچووانی ئەکادیمیای زاخۆ، پارتی بۆ مەرامی پڕوپاگەندەی هەڵبژاردن بە پەلەپوزێ زوو تەواوی کرد، بەڵام بەبێ ئەوەی پرۆتۆکۆڵی فەرمی بۆ بکرێ، بە خێرای لەگەڵ هاتنەوەی نێچیروان لە تورکیا یەکسەر ناردیان بۆ کۆتایهێنان بە خولەکەی زاخۆ. لە دەرەوەی نێچیروان هیچ کەسێک لە حکومەت و لایەنە سیاسیەکان لەوێ نەبوون، بە خودی وەزیری پێشمەرگەشەوە، سەرۆکی پارتیش دوو رۆژ بەر لەوە لەهەولێر هاواری دەکرد یەک هێزی پێشمەرگە.
ئەمڕۆ ١٦-١١-٢٠٢٤ مەراسیمی دەرچووانی خولی چوارەمی ئەکادیمیای قەلاچوالان بوو، بەئامادەبوونی نێچیروان بارزانی و سەرجەم بیرۆکراتەکانی یەکێتی و سلێمانی، بە پرۆتۆکۆلێکی شایستە.
پەیامەکان لەهەموو شوێنێک دووبارەن و بەر لەقسە کردن دەزانرێ چی دەگوترێ.
ئەوەی جێی سەرنجی چاودێرانبوو ئەمڕۆ، یەکێتی بۆچی دووسێ رۆژە بانگەشەی هاتنی نێچیروان دەکات بۆ سلێمانی، ئەی بۆ نێچیروان کەسی یەکێتی بۆ زاخۆ بانگ نەکرد؟ هەروەها ئەوەش دەگوترێ بۆ یەکێتی بەئامادەبوونی سەرۆک کۆمار کە لەخۆیانە نەیاندەتوانی مەراسیمی دەرچووانی ئەفسەرانی ئەکادیمیای قەلاچوالان بکەن، وەک مام جەلال بەردەوام بەخۆی بەڕێوەی دەبرد؟ لەلایەکیتر، ئەوەش دەگوترێ، ئایا یەکێتی دەستبەرداری پۆستی سەرۆکی هەرێم بووە بۆ نێچیروان لە کابینەی دەیەم؟ دانیشتنی قوباد تاڵەبانی لەتەنیشت نێچیروان وەک ئەوەی یەکێتی بیەوێ ئەمجارە قوباد ببێتە جێگری نێچیروان لە سەرۆکایەتی هەرێم.
خاڵی کۆتایش کە بەگرنگیەوە ئاماژەی پێدەکرێ ئەویش دەڵێن، ئەفسەر هەیە بەڵام سوپا نییە، پێشمەرگە هێشتا هێزێکی حیزبیە و نەبۆتە هێزێکی نیشتمانی، ئەو جموجۆڵەی کە پارتیش بە چەکدارەکانی دەکات لە سنورەکانی خۆی و خستنیانە خزمەت سوپای تورکیا، ئەگەر ئەفسەر بۆ ئەمە دەربچن ئەوا پێویست بەو زەحمەتیە ناکات. هەمانکات تا ئەم ساتەش بەرپرسانی بنەماڵە و حیزب دەتوانن بەئارەزووی خۆیان یاری بەچارەنووسی ئەفسەر پێشمەرگە بکەن.
بۆیە چاودێران دەڵێن، بەر لەیەکبوونی هێزی پێشمەرگە، پێویستە حیزب و بنەماڵە دەستیان لەناو هێزی پێشمەرگەدا نەمێنێ.
