سەرتیپ جەوهەر
🔻 ئەوە چ پەرلەمانێكە، بودجە دانەنێت، یاسا دەرنەكات، چاودێریی نەكات؟
🔻 لەكوێی دونیا بووە حكومەتێك لەسەر موچە هەموو دوومانگ جارێك یەك كوندە خوێن بخاتە جەرگی ئەم میللەتە
🔻 جگە لە پارتی، یەكێتیی و گۆڕان لەم بارودۆخە بەدەرنین
گرفتی موچەی فەرمانبەرانی هەرێم بووە دەردێكی گەورەی سەردڵی فەرمانبەرانی ئەم حوكمڕانیەی هەرێم. خەمی گەورە نە دەسەڵاتداران و نەئۆپۆزسیۆن قسەیەكیان لەوبارەیەوە نییە. هێشتا چللەی بانگەشەی هەڵبژاردن نەچووە، هێشتا هەڕەشەو هاوار هاواری بانگەشەی حزبەكان لەكوچەو كۆڵان و شەقامەكانی كوردستان دەنگدەداتەوە، هەبوو دەیكوشت و نەیدەشاردەوە، هەبوو كۆتایی بەم دەسەڵاتە دەهێنا، هەشبوو بەهەشتێكی بۆ خەڵك دروستكردبوو كورد وتەنی “هەر مەپرسە” لەخۆشیا لەخۆشیان لچ و لێومان تەڕ ببوو! كەچی ئەوەتا جارێكی دیكە گرفتی دواكەوتن و خواردنی موچەی فەرمانبەرانی هەرێم سەریهەڵداوەتەوەو ئەمڕۆش فركان فركانی چوونە پەرلەمان بوو، وەك ئەوەی ئەگەر پەرلەمان دانیشت، ئیدی هەموو گرفتەكان چارە دەبێت و دەرگای خێرو خۆشی دەبێتەوە. لەكاتێكدا ئەم پەرلەمانە نزیكەی 10 ساڵە پەكی كەوتووە، كەچی نەبای دێت و نەباران. نەكەس پەكی كەوتووەو نەكەسیش ئاگای لەپەككەوتنی پەرلەمان هەیە! پەرلەمانێك نەتوانێت بوجە دابنێت و قانون دەربكات و چاودێری حكومەت بكات ئەوە چ پەرلەمانێكە؟ بۆیە پرسیارە جددیەكە ئەوەیە ئەرێ ئێمە ئەم پەرلەمانمان پێویستە؟
لەم حوكمڕانیەدا ئەگەر پارتی هەژموونی بەسەر جومەگە سەرەكییەكانی دا هەیە، ئەوا یەكێتیی و بزوتنەوەی گۆڕان بەدەر نین لەم بارودۆخە، دەبێت روونكردنەوەو وڵامیان بۆ ئەم خەڵكە هەبێت. ئاخر لەكوێی دونیا هەبووە هەموو دوومانگ جارێك یەك كوندە خوێن بخەنە جەرگی ئەم میللەتەو كەسیش وڵامی پرسیاری خەڵكی پێ نەبێت؟
