ئازا پرێس
🩸سودانی بە ئەردۆغانی وتووە عێراق وەكو تەماشاكەر سەیری لێكەوتەكانی دۆخی سوریا ناكات، لە سوریا پاكتاوی رەگەزیی پێكهاتەو مەزهەبیی دەكرێت، بۆیە عێراق هەموو هەوڵێك دەدات بۆ پاراستنی ئاسایشی خۆی و ئاسایشی سوریاش.
🩸محەمەد شیاع سودانی سەرۆك وەزیرانی عێراق ئەمڕۆ ٣-١٢-٢٠٢٤ بە تەلەفۆن قسەی لەگەڵ رەجەب تەیب ئەردۆغانی سەرۆكی توركیادا كرد.
بەپێی راگەیەندراوی نوسینگەی راگەیاندنی سەرۆك وەزیرانی عێراق، لەم پەیوەندییە تەلەفۆنییەدا، قسەوباس لەبارەی دواین پەرەسەندنە ئەمنیی و مەیدانییەكانی سوریاو ناوچەكە كراوە.
📌سودانی بە ئەردۆغانی وتووە: عێراق وەكو تەماشاكەر ناوەسێت لەبەرامبەر ئەو لێكەوتە مەترسیدارانەی كە لە سوریا روودەدەن، بەتایبەتیش پرۆسەی پاكتاوی رەگەزیی پێكهاتەو مەزهەبەكان لە سوریا.
لەبارەی هێرشی ئەمدواییەی گروپە تیرۆریستەکانی سوریا بۆسەر رژێمی بەشار ئەسەدو گرتنی شاری حەلەب و چەند ناوچەیەكی تر لەلایەن چەكدارە تیرۆریستەکان، حكومەتی عێراق هەڵوێستی جیاوازی لە توركیا هەیە، توركیا پشتیوانی هەندێك لە گروپە تیرۆریستەکانی سوریا دەكات، بەڵام حكومەتی عێراق خۆی ئامادەساز كردووە بۆ رووبەڕووبونەوەیان، بەتایبەتیش لەوەدا ترسی هەیە سەرلەنوێ داعش و گروپە توندڕەوەكان زیندوو ببنەوەو هاوشێوەی كارەساتەكەی ٢٠١٤ رووبدات، كە داعش لە سوریاوە پەڕییەوە بۆ عێراق و بەشێكی زۆری خاكی عێراقی داگیرکرد.
🩸بۆیە سودانی ئەمڕۆ لە پەیوەندییە تەلەفۆنییەكەیدا بە ئەردۆغانی رایگەیاندووە” عێراق پێشتر زەرەرمەند بووە لە تیرۆرو دەرەنجامی داگیرکردنی ناوچەكانی سوریا لەلایەن گروپە توندڕەوەكانەوە، بۆیە رێگە بەوە نادەین ئەمە دووبارە ببێتەوە”.
🩸سەرۆك وەزیرانی عێراق پەیامێكی تریشی بە سەرۆكی توركیا داوە كە ئەویش “پێویستی رێزگرتنە لە یەكێتیی سوریاو سەروەرییەكەی”، جەختی كردوەتەوە كە” عێراق هەموو هەوڵێك دەدات بۆ پاراستنی ئاسایشی خۆی و ئاسایشی سوریاش”.
🩸سودانی زیاتر قسەی كردووەو باسی لەوەكردووە” ئەوەی ئەمڕۆ لە سوریا روودەدات دەچێتە خزمەتی قەوارەی زایۆنییەوە، ئیسرائیل بەشێوەیەك پێگەكانی سوپای سوریا بۆردومان دەكات كە رێگەخۆشكەر بێ بۆ ئەوەی گروپە تیرۆرستییەكان لە سوریا دەست بەسەر ناوچەی زیاتردا بگرن، سەرباری ئەمەش ئەو رێكخراوانە هیچ هەڵوێستێكی پاڵپشتیكەرانەیان نییە بۆ گەلی فەلەستین یاخود بەشێوەی روون هیچ ئیدانەیەكی دەستدرێژییەكان بۆسەر غەززە ناكەن”.
وردەكاری تەواوەتی گفتوگۆ تەلەفۆنییەكەی سودانی و ئەردۆغان نەزانراوە، بەڵام نوسینگەی سەرۆك وەزیرانی عێراق دەڵێ: جەختكراوە لەسەر بایەخی هەماهەنگیی هاوبەش لەنێوان هەردوولاو پێویستیی پاڵپشتیكردن لە ئاسایش و سەقامگیریی سوریا، بەوپێیەی بەشێوەیەكی راستەوخۆ كاریگەریی لەسەر ئاسایش و سەقامگیریی عێراق و سەرجەم وڵاتانی ناوچەكە هەیە.
📌پێچەوانەی لێدوانەکەی سەرۆکوەزیرانی عێراق، نوسینگەی سەرۆککۆمار تورکیا، هەموو پەیوەندیەکەی بەستۆتەوە بەدوژمنایەتی گەلی کورد و دەسکەوتەکانی لە رۆژئاوا.
