ئازا پرێس
🔻سەرۆكوەزیرانی عێراق لەبەغدا لەگەڵ وەزیری دەرەوەی ئەمریكا كۆدەبێتەوەو پرسی سوریا گرنگترین تەوەرەكانی كۆبوونەوەكە بوو.
ئەمڕۆ هەینی، ئەنتۆنی بلینكن، وەزیری دەرەوەی ئەمریكا، بە سەردانێك گەیشتە بەغداو لەگەڵ محەمەد شیاع سودانی، سەرۆكوەزیرانی عێراق كۆبووەوە.
بەگوێرەی راگەیەندراوێكی نوسینگەی راگەیاندنی سەرۆكوەزیران عێراق، لە كۆبوونەوەكەدا گفتوگۆ لەبارەی پەیوەندییە دووقۆڵییەكانی نێوان هەردوو وڵات و چۆنییەتی پتەوكردنی هاریكاری نێوان عێراق و ئەمریكا تاووتوێكرا.
تەوەرێكی تری كۆبوونوەكە، تایبەت بە پێشهاتەكانی بارودۆخی ناوخۆی سوریا دوای كۆتایی هاتنی حوكمی بەشار ئەسەدو گرتنەدەستی دەسەڵات لەلایەن گروپە چەكدارەكانی ئۆپۆزسیۆنی ئەو وڵاتە. سودانی جەختی لەسەر هەڵوێستی عێراق كردەوە بۆ پاڵپشتیكردنی سوریا لە قۆناغی ئێستاو بە گرنگیشی زانی سەرجەم پێكهاتەكانی ئەو وڵاتە بەشداربن لە ئیدارەدانی وڵاتەكەیان، لەپێناو روبەڕووبوونەوەی ئاڵنگارییەكان و سەقامگیری ئەمنی.
سەرۆكوەزیرانی عێراق راشیگەیاند: نابێ رێگە بەهیچ لایەنێك بدرێت هێرش بكاتە سەر خاكی سوریا و ئاسایش و سەقامگیری ناوچەكە تێكبدات.
لە بەرانبەردا وەزیری دەرەوەی ئەمریكا پابەندبوونی وڵاتەكەی بە رێككەوتنەكەیان لەگەڵ عێراق دووپاتكردەوەو وتیشی:” پێویستە رێز لە بژاردەی گەلی سوریا بگیرێت و كاربكرێت بۆ پێكهێنانی حكومەتێكی نوێ كە رەنگدانەوەی خواست و ئارەزووی گەلی ئەو وڵاتە بێت بەسەرجەم پێكهاتەكانییەوە”.
بلینكن جەختی لەسەر رۆڵی گرنگی عێراق كردەوە كە هاوبەشێكی بنەڕەتیی ئەمریكایە لە ناوچەكە، راشیگەیاند: هاوپەیمانی نێودەوڵەتی پابەندە بە پاراستنی ئاسایش و سەروەریی و سەقامگیریی عێراق.
