ئازا پرێس
ئەمڕۆ شێخ ئەدهەم بارزانی لەنامەیەکی کراوەدا کە ئاراستەی سەرۆک وەزیرانی عێراق م.شیاع سودانی کردە دەڵێت،
ئەو هەڵوێستەی سودانی بۆ سوریا جێگەی دەستخۆشیە، بەڵام پێویستە هەمان هەڵوێستی بۆ عێراقیش هەبێ، چونکە داگیرکەری تورکیا لە پارێزگاکانی هەولێر و دهۆک هیچی کەمتر نییە لەوەی سوریا.
دەقی نامەکەی شێخ ئەدهەم:
بەناوی خوای گەورە و میھرەبان..
نامەیەكی كراوە بۆ جەنابی سەرۆک وەزیرانی عێراق بەرێز محەمەد شیاع سودانی..
پاش سڵاو، هیوادارم بە سینگێکی فراوانەوە ئەم نامەیە قبوڵ بكەیت..
بەرێزتان لە چاوپێکەوتنێکی تەلەفزیونیدا باس لە چونی تورکیا دەکەن بۆ ناو خاکی سوریا کە دیارە ئەمە قەبوڵ كراو نییە و پێویستە سەروەری ئەو وڵاتە پارێزراوبێت ئەم ھەڵوێستەی بەرێزتان بێگومان جێگای رێزە.
بەڵام بەرێز سەرۆک وەزیرانی عێراق، ئەوە باشتر دەبوو كە پێش ئەوەی باسی سەروەری خاكی وڵاتێكی جیرانی عێراق بکەی باسی سەروەری خاکی عێراقت بكردایە، عێراق و کوردستانی باشور کە بەشێکە لە عێراقی ئازاد، ئێستا بەشێك لەخاكەكەی، لە پارێزگای دهۆک و هەندێک تر لە پارێزگای ھەولێر لەلایە تورکیاوە داگیركراون، وە لە وانەیە ھندێک خزمەتگوزاریەکانی کە پێشکەشی لەشکری تورکیا لە شوێنە داگیرکراوەکان دەکرێت لە سەر حسابی دارایی عێراق و ھەرێمی کوردستان بێت، ئایە ئەم داگیرکردنەی خاكی عێراق رێکەوتنە كە ماوەی چەند ساڵیكە درێژەی هەیە؟
بە بۆچوونی من مانەوی لەشکری تورکیا لە عێراق لە ساڵانی ڕابردوو دا تاکو ئێستا بەم نیمچە رەزامەندییەی کە ھەیە و وبێدەنگ بوون لەبەرامبەریدا، رەنگە ھوکارێک بووبێت تا ئەوە لەسوریاش روبداتەوە..
دیارە پێشینانمان وتویانە مروڤ تا ئاگری ناو ماڵی خۆی نەکوژێنێتە ھیچ کەسێک گلەی لێ ناکات کە بۆ بە ھانای جیرانەکانەوە نەچوە. بۆیە باشترە بیر لە چارەسەرێک بۆ وڵاتی خۆمان بکەینەوە، پاشان بە بەرێز رەجب تەیب ئەردۆگان سەرۆک کۆماری تورکیا بڵێین لە سوریا وەدەرکەون.
لە کۆتایدا رێز و سڵاوم قبول بكە
براتان
ئەدھەم عوسمان شێخ ئەحمەد بارزانی
٢٠-١٢-٢٠٢٤
