چرۆ کەرکووکی
دەولەتی تورک بە هەماهەنگی لەگەڵ دەوڵەتە زڵهێزەکانی جیهان ڕۆلێ لە ناوبردنی گەلی کوردی لە ئەستۆگرتووە. دەوڵەتە زلهێزەکانیش بە وتاری خۆهەڵواسین بە خەباتی ئازادی گەلی کورد و تەڤگەرەکەیانەوە، تەنیا ڕۆلی مەرهمی ئازار شکێن ئەگێرن.
ئەمەش سیاسەتی بریتانیا و ئەمەریکایە کە وەک دوڕووی یەک مەدالیا وان، یەکێکیان هاوکاری دەوڵەتی تورکە و ئەوی تر هاوکاری کوردە. تورک کومەڵکوژی ئەکات، وەلێ ئەوان تەنیا پەسنی لێهاتوویی شەڕ و ئازایەتی کوردان دەکەن. بەشێکی بەرچاوی گەلی کوردیش لەلایەک نەفرەت لە فاشیزمی تورک ئەکات و لە لاکەی تر شانازی و لەخۆدەرچوون بە وتاری دەوڵەتە زلهێزەکانەوە دەکەن. ئەوەی ڕوونە نە تورک بە بێ هەمانگی ئەم دەوڵەتانە هەنگاو هەڵدەگرن ونە ئەوان لە گۆڕەپانی ڕۆژهەڵاتی ناوین ئەتوانن بەبێ کورد لە جەگەکانیاندا سەرکەوتووبن.
تا ئێستاش هیچ یەک لەم دەوڵەتانە یەک بریار و هەڵوێستی گەرەنتیئامێزیان نەنواندووە و وتارەکایش سەرلەبەریان هەتا ئێستا وتاری کەسین بەبێ هیچ پشتڕاستی یاسایی، بۆیە لەباری پێچەوانەکەیدا ئەوان هیچ بەرپرسیاریەکی ئەخلاقی و یاسایی هەڵناگرن. بۆیە کورد نابێ خۆی بخەڵەتێنێ و چاوی لە دەرەوە بێت، چونکە ناوکی سێکۆچەی تورکی، ئەمەریکا و زلهێزانی ئەوروپی کە لە بەریتانیا و ئەڵمانیا و فەڕەنسا پێکهاتوون، پێکەوە داڕێژەری ئەو پلانەن. بۆیە گەلی کورد نابێ خۆی فریوبدات. تاکە گرەنتی گەلی کورد هێز و بازووی کوڕان و کچانی شەڕڤان و گەلی خۆیەتی، هەر ئەوەش دەبێتە گەرەنتی هەر ڕێکەوتنێکی فەرمی بۆ دەستەبەرکردنی مافەکانی خۆی کە لەلایەن هێزە هەرێمی و ناودەوڵەتیەکانەوە پەسەند دەکرێت.
