بەناوی خوای گەورە
بەڕێزان:
٭سەرۆکایەتی ئەنجومەنی نوێنەرانی عێراق
٭ سەرۆکایەتی ئەنجومەنی وەزیرانی عێراق
٭سەرۆک و ئەندامانی لیژنەی دارایی پەرلەمانی عێراق
٭وەزیری دارایی عێراق
٭سەرجەم لایەنە پەیوەندیدارەکان
وەکو ئاگاداران مووچەخۆرانی هەرێمی کوردستان زیاتر لە (10) ساڵە لە دۆخێکی دارایی و ئابووریی سەختدا دەژین؛ چونکە لەو ماوەیەدا حکومەتی هەرێمی کورستان
(١٨) مانگی تەواو مووچەیان پێنەداون و (٤٤) مانگیش بەناوی جۆراوجۆرەوە بڕێکی زۆری مووچەی مووچەخۆرانی هەرێمیان بڕیوە.
لە هەمان کاتیشدا لەساڵی (٢٠١٦)ەوە پلەبەرزکردنەوەی مووچەخۆرانیان ڕاگرتووە.
لە ماوەی ئەم دە ساڵەدا ئێمەی مامۆستایان و فەرمانبەران بۆ گێڕانەوەی مافەزەوتکراوەکانمان؛ چەندین ڕێگەی مەدەنیمان گرتووەتەبەر، سەدان خۆپیشاندانمان ئەنجامداوە و سەدان ڕۆژ بایکۆتی هۆڵەکانی وانەوتنەوە و فەرمانگەکانمان کردووە.
هاوکات سەردانی لایەنە پەیوەندیدارەکانمان کردووە و پەیام و داواکاری خۆمانمان پێگەیاندوون.
بەداخەوە دەسەڵاتدارانی هەرێم لەجیاتی وەڵامدانەوەی داواکارییەکانمان، هەمیشە بە تووندترین شێوە، بەرەنگاری مامۆستایان و فەرمانبەران بوونەتەوە. سەدان ناڕەزاییان لێ دەستگیرکردووین و چەندین مامۆستا و خۆپیشاندەریان شەهیدکردووە.
ئێستاش دوای ئەو ماوە دوور و درێژە، کێشەکان نەک چارەسەر نەبوون؛ بەڵکو قووڵتربوونەتەوە.
لە ئێستادا کە ئەم پەیامەتان ئاڕاستە دەکەین؛ لە سنووری پارێزگاکانی سلێمانی و هەڵەبجە و ئیدارەکانی ڕاپەڕین و گەرمیان و قەزای کۆیەی پارێزگای هەولێر، دەرگای قوتابخانەکان و زۆرێک لە فەرمانگەکان داخراون و مامۆستایان و فەرمانبەران بەهۆی بێمووچەییەوە بایکۆتی دەوامیان کردووە، هاوکات له ئێستادا بۆ داکۆکی له مافەکانمان ژمارەیەک مامۆستا و فەرمانبەری هاوڕێمان لەبەردەم نووسینگەی سلێمانی نەتەوەیەکگرتووەکان لە پارێزگای سلێمانی مانیان لە خواردن و خواردنەوە گرتووە.
ئاگادارین لە ئێستادا هەوڵ و گفتوگۆ هەیە بۆ چارەسەری پرسی مووچە؛ بەڵام بەداخەوە گفتوگۆکان تاوەکو ئێستا بەرهەمێکی ئەوتۆیان نەبووە، بۆیە ئێمە لە ئەنجومەنی سەرتاسەریی مامۆستایان و فەرمانبەرانی ناڕازیی هەرێم، دوو ڕۆژە هاتووینەتە بەغداد، تا لەنزیکەوە وەکو هاووڵاتییەکی عێراقی، گرفت و داواکارییەکانی مووچەخۆرانی هەرێمی کوردستان ئاڕاستەی بەڕێزتان بکەین.
لە گرنگترین داواکارییەکانیشمان ئەمانەن:
١ـ دەستپێکردنەوەی پلەبەرزکردنەوەی مووچەخۆرانی هەرێم، هەروەها ئەو مووچەخۆرانەش کە خانەنشین دەکرێن، بەو پلەیەی کە شایستەی بوون، خانەنشین بکرێن.
٢ـ پرۆژەی “هەژماری من”ی دەسەڵاتدارانی هەرێم ڕەتدەکەینەوە و داواکارین مووچەکانمان هاوشێوەی مووچەخۆرانی عێراقی؛ لەلایەن بانکە فیدراڵییەکانی حکومەتی عێراقەوە تەوتین بکرێت.
٣ـ بەزووترین کات لقی بانکەکانی ڕەشید و ڕافیدەین لە پارێزگاکانی هەرێمی کوردستان بکرێنەوە، بۆ ئەوەی تەوتینکردنی مووچەی مووچەخۆرانی هەرێم دەستپێبکات.
٤ـ لە هەموواری پرۆژەی یاسای بوودجەدا بڕێک پارەی پێویست تەرخان بکرێت بۆ گێڕانەوەی مووچە بەناو پاشەکەوتکراوەکان و ئەو مووچە و بڕە پارانەی، بەهەر ناوێکەوە لە مووچەکانمان بڕاون.
٥ـ بەزووترین کات پرسی مووچەی مانگی دوانزەی ساڵی ڕابردوو و مانگی یەکی ساڵی نوێ یەکلایی بکرێنەوە و دابەشبکرێن.
لە کۆتاییدا
داواکارین حکومەت و پەرلەمانی عێراق، ئەرکە یاسایی و دەستوورییەکانی خۆیان بەرامبەر مووچەخۆرانی هەرێم جێبەجێ بکەن و مووچەی مووچەخۆران دووربخرێتەوە لە ململانی سیاسییەکان و بڕیارەکانی دادگای فیدراڵی جێبەجێ بکرێن و ئێمەی مامۆستایان و فەرمانبەرانی هەرێم نەکرێین بە قوربانی گەندەڵی و ناشەفافییەکانی دەسەڵاتدارانی هەرێم.
هەر لێرەوە ڕایدەگەیەنین مامۆستایان و فەرمانبەرانی مانگرتوو لە پارێزگای سلێمانی لە دۆخێکی تەندروستی خراپدان، ژیان و سەلامەتی ئەوان لە ئەستۆی هەردوو حکومەتی عێراق و هەرێم و ڕێکخراوی نەتەوەیەکگرتووەکانە، بۆ پارێزگاری لە ژیانی ئەوان و بەهەند وەرگرتنی داواکارییەکانمان؛ چاوەڕوانین پرسی مووچەی مووچەخۆرانی هەرێم بەزووترین کات چارەسەر بکەن.
