ئازاپرێس
ئەدهەم بارزانی هێڵە سوورەکانی بەزاند
دوێنێ ئەدهەم بارزانی ، ئامۆزای مەسعود بارزانی سەرۆکی پارتی دیموکراتی کوردستان کە لەئێستادا بەهۆی فشاری سیاسییەوە بنەماڵەکەی جێهێشتووە و لەشاری سلێمانی نیشتەجێیە ، وەک هەر سیاسییەکی تر بەبۆنەی جەژنی ڕەمەزانەوە پەیامێکی بڵاوکردەوە ، پەیامەکەی ئەدهەم بارزانی تێکەڵەیەک بوو لەپیرۆزبایی و بیروڕای سیاسی دەربارەی دۆخی سیاسی هەرێمی کوردستان و ناوچەکە ..
بەپێی زانیارییەکان ، پەیامەکەی ئەدهەم بارزانی نیگەرانی زۆری لای بەرپرسانی باڵای پارتی و بنەماڵەکەی لێکەوتووەتەوە و بۆ ئەو مەبەستەش ڕێنمایی بە میدیا سێبەر و نافەرمییەکان و ژمارەیەک لەنوسەرانی نزیک لەپارتی کراوە کە هێرشێکی میدیایی توند و فراوان بکەنەسەر ئەدهەم بارزانی و ئازاد کراون لەوەی چی پێدەڵێن و چۆن وەڵامی دەدەنەوە ، لەئێستادا ئەو هێرشە میدیاییە لەسەر ئەدهەم بارزانی بەڕێوەدەچێت و لەچەندین میدیای سێبەری پارتییەوە هێرشدەکرێتەسەری ..
ئەدهەم بارزانی لەپەیامەکەیدا باسی داگیرکردنی پارێزگای دهۆک لەلایەن سوپای تورکیا و بەکەم سەیرکردنی خەڵکی بادینان لەلایەن دەسەڵاتدارانی ناوچەکە دەکات و هیوای ئازادبوونیان بۆ دەخوازێت ..
دەقی پەیامەکەی ئەدهەم بارزانی 🔻
🔻ئەدهەم بارزانی: بە دوری نابینم گۆڕانکاری گەورە بێتە ئاراوە
🔻لە پێکهێنانی حکومەت و کابینەی داهاتووی هەرێمدا ھەر وەک ٣٣ ساڵی پێشوو تەنها بیر لە بەرژەوەندیەکانی کەسی و حزبی خۆیان نەکەنەوەو لەو قاڵبە ناشرین و ناڕەوایەی٣٣ ساڵی ڕابردوو دەربچن.”
🔻دەقی پەیامی پیرۆزبایی ئەدهەم بارزانی بەبۆنەی جەژنی ڕەمەزانەوە:
بەناوی خوای گەورەو میهرەبان..
بەبۆنەی هاتنی جەژنی ڕەمەزانی پیرۆزەوە، جوانترین پیرۆزبایی ئاڕاستەی موسڵمانانی جیهان و بەتایبەت موسوڵمانانی کوردستان دەکەم و لە خودای گەورە داواکارم ڕۆژو و نوێژ و نزای هەموو لایەکی قبوڵ کردبێت.”
هیوادارم ئەم جەژنە ببێتە مایەی ئاسودەی بۆ گەلی کورد، وە سیاسیەکانی باشوری کوردستان لە پێکهێنانی حکومەت و کابینەی داهاتووی هەرێمدا ھەر وەک ٣٣ ساڵی پێشوو تەنها بیر لە بەرژەوەندیەکانی کەسی و حزبی خۆیان نەکەنەوەو لەو قاڵبە ناشرین و ناڕەوایەی٣٣ ساڵی ڕابردوو دەربچن و لەناو حکومەت و دامەزراوەکاندا گۆڕانکاری بکەن بۆ ئەوەی بە باشی لە خزمەتی هاوڵاتیاندابن، ھەر چەندە ناتوانن متمانە دروست بکەنەوە کە زۆر بەدوور دەبینم جارێکی دیکە میللەت ئەم دەسەڵاتەی ئێستا بە ھی خۆی بزانێت چونکە لە ھەموو بوارێک دا تەواوی سنورەکانیان بەزاندووە.”
دەمەوێت لێرەشەوە بەتایبەت پیرۆزبایی لە مەھاباد و ھەموو رۆژھەڵات و لە ئامەد و ھەموو باکور و لە کۆبانێ و ھەموو رۆژئاوا و دانیشتوانی تاراوگە و ھەروەھا هاوڵاتیانی هەر پێنج پارێزگاکەی کوردستان بکەم و بە کەرکوکی خۆێنمان بڵێم بە تەمایی لە ئامێز گرتنی تۆین، وە ھیوادارم کە مژدەی دڵخۆشی بە خەڵکی دهۆک بدەین کە لە ئایندەیەکی نزیکدا بە دەرچوونی سوپای داگیرکەر لە ناوچەکانیان ترس و دڵەڕاوکێیان نەمێنێت، هەروەها هیوام خۆش بەختی و ئاسودەییە بۆ هاوڵاتیانی میوان دۆست و خۆشەویستی پارێزگای سلێمانی و ئومێدی هەرچی زووە ئازادی تەواو بۆ هاوڵاتیانی هەولێری زێدە ئازیز دەخوازم.”
هەروەها هیواخوازم بەپارێزگابوونی هەڵەبجە وەکو کەیسێکی سیاسی هیچکام لەلایەنە کوردی و عێراقییەکان سەیری نەکەن، بەڵکو لەپای ئەو هەموو نەهامەتی و پێنج هەزار شەهیدەی لە کیمیابارانکردنی شارەکەدا خنکێنران، سەیری بکەن.”
لە کۆتایشدا جەژنە پیرۆزە لە خەڵکە جوامێر و موریدە بەئەمەکەکانی شێخی مەزن لە دەڤەری بارزان دەکەم کە زیاتر لە سەدەیەکە مەڵبەندی کوردایەتی و شۆڕش و ڕاپەڕین بوون و ئومێدیش دەکەم کە ئازادی خۆیان بە دەست بێنن و چیتر بە چاوی کەم سەیریان نەکەن و لە زوترین کات دا سەرفیرازی بۆیان بگەرێتەوە و بێگومان بە دوریشی نابینم گۆڕانکاری بێتە ئاراوە.”
دووبارە جەژنتان پیرۆز و لە خۆشی و ئارامیدابن..
براتان
ئەدهەم عوسمان شێخ ئەحمەد بارزانی
٣٠-٣-٢٠٢٥
