شیکاری ئازاپرێس
رۆژانی دوایی هەواڵێک بڵاو بووە و ئاماژەی بەوە دا کە لە دانوسانەکانی پێکهێنانی حکومەت پارتی داوای کردووە کە مونا قەهوەچی لە کابینەی بکرێت بە وەزیری ڕۆشنبیری و ئەوەش کاردانەوەی جیاوازی لێکەوتەوە لە سۆشیال میدیا و بوو بە جیی توانج و ڕەخنەی خەڵکی هەرێم.
ساڵانێکی زۆر بەرلە بانگەشەی ئاشکرای دواهەمین کابینەکانی حکومەتی تورکیا بە سەرپەرشتی پارتی داد و گەشەپێدان – ئاکەپە و تورکیا بۆ خاوەنداری لە ویلایەتی موسڵ( هەرێی کوردستان بە ناوچە دابڕاوەکانیشەوە)، ڕەق و کینەیەکی تۆڵەسێنی مێژوویی کوردانی باشوور بەرامبەر بە تورکیا و فەرهەنگ و کلتوری تورکی لە هەرێمی کوردستان هەیە. ئەو نەیارییەش لە هەرێمەکانی سلێمانی و دەڤەری ڕاپەڕین و گەرمیان، ڕاستتر بڵێن دەڤەری زۆنی دەسەڵاتی یەکێتی لە لوتکەدایە و ڕیشەیەکی مێژوویی هەیە، کە ڕەنگە بگەڕێتەوە بۆ سەردەمی ناکۆکی میرنشینی سۆران و بابانەکان و تەنانەت پێش ئەویش. بەڵام سەرباری هەبوونی گەلی تورکمان لە هەولێر و کەرکوک و موسڵ ئێشتا گەلی کورد لەو پارێزگایانەش بە هەستیارییەوە نزیکی هەموو پەلهاوێشتنێکی کلتوری تورکی دەبنەوە و ڕۆژ بەڕۆژ دژایەتیکردنی داگیرکاری کلتوری تورکی لە دەڤەری دەسەڵاتی پارتی و خودی هەولێریش لە هەڵکشاندایە. هۆکاری ئەو بەرهەڵستییەی کلتوری داگیرکەران و بەتایبەتی چاند و کلتوری هەژمونگەری تورکیا لە باشوور هێژای چەندین لێکۆڵینەوە و توێژینەوەی زانستی و فەرهەنگیی و فکرین.
دەوڵەتی تورکیا زیاتر لە ۳۰ ساڵە کار لەسەر موتوربەکردنی باشوری کوردستان دەکات بەکلتوری تورکی و بڵاوکردنەوەی زمان وئەدەب و هونەری تورکی لە هەرێم. بۆ ئەوەش سەرمایەیەکی زەبەلاحیان تەرخان کردووە و لەم ساڵانەی دواییدا خۆسەپێنی کلتوری تورکیا بە داوەتکردنی کەسایەتیە تۆرانی-پەرستەکانی تورکیا ڕۆژ بە ڕۆژ لە هەڵکشاندایە. بەڵام شکستی شاڵاوی داگیرکاری تورکیا لە ڕوی سەربازی و سیاسی و فەرهەنگیشەوە ئەو ڕاستییەی پیشانی ئەوان دا کە گەلی کورد لە باشووری کوردستان وابەئاسانی وابەستەی کلتوری تورکی نابن و بەرهەڵستی دەکەن، تەنانەت بنەماڵەی بارزانی و پارتیش نەیانتوانی گەلی باشوور ناچاری خۆبەدەستەوەدان بکەن و بە چەشنی ئەرزڕوم و ئەرزنجان و زۆر ناوچەی تری باکووری کوردستان هونەر و کلتور و زمانی تورکی زاڵ بکەن.
هاتنی کەسایەتییەکی بەناو هونەرمەندی تۆرانی وەک بوراک ئۆزجەڤید “بۆ نمونە” لە ئێستادا بۆ جەختکردنەوەی سیاسەتی داگیرکاری دەوڵەتی تورکیایە لە ڕووی کلتوری و فەرهەنگییەوە بەسەر حکومەتی داهاتوی هەرێمی کوردستان، بەتایبەتی بۆئەوەی لەوڕێیەوە ئیدی وەزارەتی بەناو ڕۆشنبیری لەڕێی کەسێکی وەک مونا قەهوەچییەوە بکرێت بە لەمپەڕ لەبەردەمی سەرتاپای پڕۆژە و کارە هونەری و کلتورییەکانی دەڤەری سلێمانی و دەوروبەری کە ئەگەر لەدژی کلتور و سیاسەتی خۆسەپێنی تورکیا بن. لە ڕابردوودا تورکیا توانیویانە دەزگای هەواڵگری و ئاساییشی هەرێمی کوردستان بۆ مەرامەکانی خۆی بەکاربهێنێ و تاڕادەیەک تەواوی حکومەتی هەرێمی کوردستانیشی کردووە بە دەزگایەکی کاربەڕێکاری ئەجنداکانی خۆی و سیاسەتی داگیرکاری بەناو – میساقی میلی. ئەمڕۆ دەیانەوێت داگیرکاری کلتوریشی بۆ زیاد بکەن، ئیدی لەلامان سەیر نەبێت کە گێڕانی ئاهەنگ و بۆنە نیشتیمانییەکان و ئاگری نەورۆز و تەنانەت شێوازی پۆشینی جل و بەرگیش لە بۆنە کلتوری و فیستیڤاڵەکاندا لە هەرێم لە بن ڕکێفی ئەنکەرەدا بەڕێوە نەچن، ئەگەر تورکیا بتوانێ لەڕێگای بنەماڵەی بارزانی و کابینەی نوێی حکومەتەوە دەست بەسەر ئەو کایە هەستیارەدا بگرێت.
