ئا: ئازا پرێس
لە نوێترین لێداونی وەزیری دەرەوەی عێراق لە پشکی پارتی، فواد حسێن، دەڵێت:
هیچ رێکەوتنێکی لەشکرکێشی لەگەڵ تورکیا نەکراوە. بەغدا و ئەنقەرە هیچ رێککەوتنێکیان لەبارەی هاتنەناوەوەی سوپای تورکیا بۆ ناو خاکی عێراق نهكردووه.
فواد حسێن سەبارەت بە دواین رێککەوتنیش کە لە سەرەتای مانگی نیسان لەنێوان ئەردۆغان سەرۆککۆماری تورکیا و مەحمەد شیاع سودانی سەرۆک وەزیرانی عێراق واژۆکران وەک یاداشتنامەی لێکتێگەیشتن بەناو دەکات و دەڵێت؛ ئەوەی هەیە تەنیا یاداشتنامەیەکی لەیەکگەیشتنە، نەک رێککەوتن، ئەویش دەگەڕێتەوە بۆ سەرەتای هەشتاکانی سەدەی رابردوو، لە سەردەمی رژێمی بەعس کراوە، تاریق عەزیز وەزیری دەرەوەی ئەوسای عێراق و وەزیری دەرەوەی تورکیا رەشنووسێکی لەیەکگەیشتنیان ئیمزا کردووە و لەوێدا ئاماژە دراوە بەوەی “لایەنی تورکی بۆی هەیە بۆ ماوەی ٧٢ کاتژمێر لە قوڵایی پێنج کیلۆمەتر ئۆپەراسیۆن لە خاکی عێراقدا بکات، بەو مەرجەی پێشوەختە لایەنی عێراق لە مەبەستی ئۆپەراسیۆنەکە ئاگادار بکاتەوە”.
لە بەردەوامی لێدوانەکەیدا دەڵێت: ئەوەی کراوە تەنیا بۆ یەک ساڵ بووە و درێژکردنەوەی نەبووە، هەربۆیە هیچ ڕێککەوتنێک لە نێوان عێراق و تورکیا نییە، بەڵام ئەوەی ئێستا هەیە تورکیا داوا دەکات ڕێگری لە چالاکییە چەکدارییەکانی پەکەکە بکرێت، کە ئەویش حزبێکی تورکیایە و لە ناوچە سنوورییەکان هەن”.
بەگوێرەی ئامارەکانی رێکخراوی ئاشتی کرستیانی (CPJ) لەماوەی دوو ساڵی رابردوو تورکیا ٦٥ بنکەی سەربازی لە ناو سنوری عێراق دروست کردووە، دیسان لە ماوەی مانگی رابردوو سوپای تورکیا گەیشتە سەر شەقامی سەرەکی نێوان ئامێدی و شێڵادزێ و دێرەلوک، هەروەها بەئاشکرا بازگەی سەربازیان لە گوندی هرور داناوەو بە عەرەبیشیا لەسەر نووسیوە ئێرە سنوری تورکیایە.
بەگوێرەی زانیاریەکانیش کە لە هاوڵاتیانی سنورە داگیرکراوەکان دەگاتە راگەیاندنەکان، ئەویش کاتێک مۆبایلێک دەگاتە سنوری ئامێدی بەتورکی نامەیەکی بۆ دێت و دەڵێت؛ بەخێربێی بۆ ناو خاکی تورکیا.
لەماوەی نزیکدا ئەردۆغان و بەرپرسانی تری تورکیا بەئاشکرا گووتیان؛ ئەو شوێنانەمان لە ماڵی بارزانی کڕیوە، بۆیە مافی خۆمانە بێین و تیاشی بمێنینەوەو بنکەی سەربازیشی لێ دروستکەین و دارەکانیشی ببڕین و کەسیش ناتوانێ هیچمان پێ بڵێ.
لەلایەکیتر راگەیاندنەکانی تورکیا و کامیرای مۆبایلی هاوڵاتیانی ناوچەکەش بە روونی ئەوە دەردەخەن کە هێزەکانی پاسەوانی سنور کە سەربە حکومەتی فیدراڵن. پارێزگاری لە سوپای تورکیا دەکەن و یارمەتیشیان دەدەن بۆ دروست کردنی رێگە و گەیاندنی کەرستەی سەربازی و ئاو خۆراک بە قەرەقۆڵەکانیان.
فواد حسێن باش دەزانێ بەڵام لەبەر رێککەوتنی سەرۆکایەتی حیزبەکەی کە لە ساڵی ١٩٩٢ لەگەڵ دەوڵەتی تورکیا کردووە لە فەرمانداریەتی جەندرمەی سوپای تورکیا لە ئەنقەرە کە ئەفسەری تیرۆر کراو جەم ئەرسەڤەر بەڵگەکانی بڵاو کردۆتەوە. هەروەها حکومەتی حەیدەر عەبادی لە دژی ریفراندۆمەکەی پارتی رێککەوتنێکی لە ٢٠١٧ لەگەڵ تورکیا واژۆ کرد بۆ هاتنی بۆ ناو خاکی عێراق. دیسان حکومەتەکەی مەحمەد شیاع سودانیش بەناوی لێکتێگەیشتن، بەڵام رێککەوتنێکی ٢١ خاڵی لەگەڵ ئەردۆغان لە بەغدا لە ٢٠-٤-٢٠٢٤ واژۆکرد، ئەو پرسیارە رووبەڕووی فواد حسێن بکرێتەوە، ئەگەر تەنها لێکتێگەیشتن بوو، ئەی قەدەخە کردنی پەکەکە و داخستنو هەڵوەشانەوەی سێ حیزبی کوردی لەلایەن حکومەتەکەتان بەگوێرەی کامە رێککەوتن بووە لە گەڵ تورکیا؟؟ تورکیا لە راگەیاندنەکانی لە سەر زمانی وەزیری دەرەوەی هاکان فیدان ئەوەی ئاشکرا کرد کە لەگەڵ عێراق رێککەوتوون.
لەئێستا تورکیا لە هەرێمی بادینان هەریەک لە ناحیەکانی، باتیفە، بامەڕنێ، ئەنیشکێ، قادیشێ، کانی ماسی، دیسان قەزای ئامێدی و ناحیەی دێرەلوک و شێلادزێ و کۆمەڵگەی سیرێی داگیرکردووە. فواد حسێن وەک وەزیری دەرەوە کە بەرپرسیارە لە پاراستنی سەروەری عێراق، تورکیا بەکامە رێککەوتن و یاسا ئەو ناحیەو قەزایانەی داگیرکردووە؟؟