ئا:ئازاپرێس
پێش نیوەڕۆی ئەمڕۆ دەوڵەتی داگیرکەری تورک ئۆتۆمبێلێکی ڕۆژنامەنووسانی کردە ئامانج، کۆمپانیای چەتر کۆنگرەیەکی ڕۆژنامەنووسی ئەنجامدا و تێیدا ڕەحمان غەریب ڕێککخەری سەنتەری میترۆ بۆ داکۆکیکردن لە مافی ڕۆژنامەنووسان و كاروان ئەنوەر سەرۆكی لقى سلێمانى سەندیكای ڕۆژنامەنووسانی هەرێمی كوردستان رایانگەیاند.
کەمال حەمە ڕەزا بەڕێوەبەری گشتی کۆمپانیای چەتر بۆکارى میدیاى ڕایگەیاند، بێگومان دەستێکی ڕەشی ناوخۆیی و دەستێکی سیخوڕی وایکرد دەزگای سیخوڕى دەوڵەتى تورک ئەو دوو ڕۆژنامەنووسەمان شەهید بکەن.
ئاماژەی بەوەشکرد، کۆمەڵێک دەزگای ڕاگەیاندنی چەواشەکار دوور لە ئێتیکی کاری ڕۆژنامەوانی بڵاویان کردووەتەوە کە ئەو سێ کەسەی بوونەتە قوربانی چەکداری پەکەکەن، ئەو سێ کەسە ڕۆژنامەنووسن و دوور و نزیک هیچ پەیوەندییەکیان بە سیاسەتەوە نییە.
ئەوەشی خستەڕوو، دەمەوێت بە تایبەت ناسنامەی شەهید گولستان تارا ڕوونبکەمەوە کە خەڵکی باتمانی باکووری کوردستانە و ماوەی سێ ساڵە ئازادانە لە بواری ڕۆژنامەنووسیدا لە کۆمپانیاى چەتر کاردەکات.
لەبارەى شەهیدى دووەمەوە وتیشى، هێرۆ بەهادین لە دایکبووی شاری سلێمانییە و بنەماڵەکەشی خەڵکی گوندی تیمارن، هەروەها، ڕێبین بەکریش کە بریندارە بەهەمان شێوە خەڵکی شاری سلێمانییە.
لە کۆتایشدا بەڕێوەبەرى کۆمپانیای چەتر وتی: داوا لە هەموو لایەک دەکەم بە خستنەڕووی ڕاستییەکان ڕووبەڕووی ئەو دەزگا چەواشەکارانە ببنەوە.
ڕەحمان غەریب ڕێککخەری سەنتەری میترۆ بۆ داکۆکیکردن لە مافی ڕۆژنامەنووسان ڕایگەیاند، بێدەنگی حکوومەتی عێراق و هەرێم هۆکاری بەردەوامی بۆردوومان و داگیرکارییەکانی دەوڵەتی تورکیان. وەک دەزانرێت دەوڵەتی تورکیا نزیکەی ٥٠ کیلۆمەتر لە سنوورەکان هاتووەتە ناوەوە و ڕۆژانە هاوڵاتیانی مەدەنی دەکاتە ئامانج.
ئاماژەی بەوەشکرد، هۆکاری بەردەوامی ئەو داگیرکاریی و بۆردوومانانەی دەوڵەتی تورکیا، کە هاوڵاتیان و ڕۆژنامەنووسان دەکاتە ئامانج بێ دەنگی و بێ هەڵوێستیی حکوومەتی عێراق و هەرێمە.
كاروان ئەنوەر سەرۆكی لقى سلێمانى سەندیكای ڕۆژنامەنووسانی هەرێمی كوردستان لە بارەی شەهیدكردنی دوو ڕۆژنامەنووسی كۆمپانیای چەتر، لە كۆنگرە ڕۆژنامەوانیەکەدا بەمجۆرە بۆ میدیاكان دوا:”بەداخەوە ئەمڕۆ دوو ڕۆژنامەنووسی كۆمپانیای چەتر شەهید بوون، ئێمە بە توندى ئیدانەی هەر هێرشێك بۆ سەر ڕۆژنامەنووسان دەكەین، بەپێی یاسا نێودەوڵەتییەكان ڕۆژنامەنووس بەدەرە لە هەموو قەیرانەكان، تەنانەت لە ناو جەنگیشدا ڕۆژنامەنووس گوللەی ئاراستە ناكرێت”.
ئاماژەی بەوەشكرد، ئەوەی ئەمڕۆ ڕوویدا وەرچەرخانێكە بە ئاراستەیەكی خراپ، ئێمە لەگەڵ سەنتەری میترۆ ڕاگەیاندراوی هاوبەشمان دەبێت، هەروەها ئەم ڕووداوەى ئەمڕۆ دەگەیەنینە سەرجەم ڕێكخراو و فیدراسیۆنە نێودەوڵەتییەكان.
لەكۆتایشدا وتی، بەداخەوە بۆ ڕووحی پاكی هەردوو شەهید، هیوادارین ئەمە دواین کارەساتى ڕۆژنامەنووسان بێت، چونكە ڕۆژنامەنووسان نە چەك بەدەستن نە هێزیان هەیە، بەڵام كە پرشی ئاگرمان بەركەوت دەبێت هەڵوێستى خۆمان وەربگرین، كە جارێكی دیكە بەمشێوەیە ڕۆژنامەنووسانمان نەكرێتە قوربانی كێشەكانی ناوچەكە.
جێگای ئاماژەیە، بەیانی ئەمڕۆ گرووپێك لە ڕۆژنامەنووسانی كۆمپانیای چەتر بۆ تۆماركردنی ڕاپۆرتێكی میدیای بەرەوە ناوچەی هەورامان بەڕێكەوتن، بەڵام لە ڕێگادا و لە نزیك شارۆچكەی سەیدسادق لەڕێگەی فڕۆكەیەكی بێفڕۆكەوانی دەوڵەتی توركەوە كرانە ئامانج و دوو ڕۆژنامەنووس شەهید بوون و شەش ڕۆژنامەنووسی دیكە بریندار بوون.
