ئا:ئازاپرێس
ئاکادیمسین و رۆژنامەنووس کەمال چۆمانی، لەسەر بەیاننامە دوو دێڕیەکەی پارتی کەبەبۆنەی ٣١ئاب بڵاویان کردۆتەوە، نووسیویەتی، پارتی دەڵێ خراپترمان بە خراپ راماڵی. ئەوە شەرعییەتدانە بە هەرچی بێئەخلاقیی سیاسییە. لە بەرانبەر ئەو دەستەواژە عەرەبییەی کە پارتی لە بەیاننامەکەی بە (دفع الافسد بالفاسد) ناودێڕی کردووە.
دوێنێ ئێوارە بەبۆنەی ٣١ئاب کە پارتی وەک سەرکەوتنی بەسەر یەکێتی رادەگەێنێ لە هەولێر، بە پشتیوانی و پێشەنگایەتی سوپای رژێمی بەعسی رووخاو، مەکتەبی سیاسی پارتی وەڵامی پەیامەکەی مەکتەبی سیاسی یەکێتیان دایەوەو نووسیویانە؛
چەند هاوار بکەن، قسە بکەن و بەیاننامە بڵاوبکەنەوە، هەرچییەک دەکەن، حەقیقەتی ٣١ی ئابی ١٩٩٦ ئەوەیە:
٣١ی ئاب (دفع الافاسد بالفاسد) بوو.
کەماڵ چۆمانیش لە پەڕەی فەرمی خۆی وەک شیکارێک بۆ ئەو بەیاننامەیی پارتی دەڵێت:
پارتی دەڵێ خراپترمان بە خراپ راماڵی. ئەوە شەرعییەتدانە بە هەرچی بێئەخلاقیی سیاسییە. واتا بۆ بردنەوە لە نەیارە سیاسییەکەت، هەمو رێگایەک ئاسایییە، تەنانەت ئەگەر رێککەوتن لەگەڵ کەسێکیش بێت کە تاوانی جینۆسایدی گەلەکەتی ئەنجامداوە. ئەوە رۆحی سیاسەتی ماکیاڤێلییانەیە کە پێیوایە <<لە سیاسەتدا بۆ بەدەستهێنانی ئامانجێک، هەمو هۆکارێک رەوایە.>>
لە درێژەی وتارەکەیدا ئەو ئەکادیمیسێنە دەڵێت:
پارتی لەڕێی بەعەقڵانیکردنی تاوانێکەوە، رەوایەتی دەداتە ئەوانیدیش کە لەڕێی هاوکێشەی <<ئەفسەد بیل فاسید>> رەوایەتی بە کردەکانیان بدەن ئەگەر خیانەتیش بێ. ئەوە خراپترینی خراپەکانە، چونکە هەرچی بەهایە بنپێدەخرێ. بەعەقڵانیکردنی تاوان ئاسانە، بەڵام لە تاوان گەورەترە. هیچ تاوانێک لە مێژوودا نەکراوە بێ عەقڵاندنی و دۆزینەوەی هۆکارێک بۆ شەرعاندنی. هیچ تاوانێک نەکراوە، بێ دۆزینەوەی هۆکارێکی نائەخلاقییانە و نائینسانییانە بۆ شەرعاندنی بە تاوانی جینۆسایدی کورد و جوو و ئەرمەنەکانیشەوە، بەو تاوانی جینۆسایدەی ئێستاش لە غەززە روودەدات، بەو تاوانی جینۆسایدەی تورکیاش بەرانبەر کورد دەیکات.
چۆمانی زیاتر راوەستەی لەسەر دەکات و دەنووسێت: هەرگیز هەرگیز ئەفسەد بیل فاسید هاوکێشەیەک نییە ئینسان دەستی بۆ ببات، چونکە ئەوە پرسی بردنەوەی قائیمقامییەت و کورسییەکی هەڵبژاردن نییە، ئەوە پرسی شەڕ و خوێنڕشتنی هاونیشتیمانییەکەتە، پرسی وێرانکردنی کۆمەڵگەیەکە بۆ چەندان نەوەی داهاتوو، پرسی دەستتێکەڵکردن لەگەڵ کەسێکە کە لەسەر تاوانی جینۆسایدی کورد و شیعە لەسێدارەدرا.
لەکۆتایدا کەمال چۆمانی رەخنە لە هەردوو لایەنی شەڕی ناوخۆ پارتی و یەکێتی دەگرێت و دەڵێت:
ئەو جۆرە مامەڵەیەی یەکێتی و پارتی لە پرسی ٣١ی ئاب، بۆ شاردنەوەی تاوانی شەڕی ناوخۆیە، نەک ئامانجی ریسواکردنی شەڕی ناوخۆ و بیرهێنانەوەی بۆ ئەوەی هەرگیز روونەدات. ئەو مامەڵەیە بۆ پرسی بەدەستهێنانی عەدالەتی راگوزەر نییە، بەڵکو بۆ ئەوەیە هەرگیز باسی عەدالەت نەکەین، چونکە دەمانترسێنن بەوەی هەمان تاوان ئەنجامدەدەنەوە.
