ئازا پرێس
کۆمەڵەکان دوای نیشتەجێبوونیان لە سنوری قەرەداغی رۆژهەڵاتی سلێمانی لە گوندی زڕگوێز و زڕگوێزەڵان، دەگوازرێنەوە بۆ رۆژئاوای سلێمانی سنوری ناحیەی سورداش. ئەمڕۆش دەستیان بە چۆڵکردنی کامپەکانیان کرد.
هێزە ئەمنییەكانی سلێمانی بە ژمارەیەك بارهەڵگرەوە چونە ناو هەرسێ ئۆردوگای (زڕگوێز- بانەگەورە- زڕگوێزەڵان). یەكەم كاروانی هێزەكانی رۆژهەڵاتی كوردستان لەو كەمپانە، ئەمڕۆ رەوانەی (سورداش) دەكرێن، ئەمە جێبەجێكردنی تەواوەتی رێككەوتنی ئەمنیی نێوان عێراق و ئێرانەو دوای چۆڵكردنی تەواوەتی كەمپی هێزەكانی رۆژهەڵات رادەستی هێزە ئەمنییەكانی سلێمانی دەكرێت.
لایەنە سیاسیەکانی نیشتەجێی کامپەکان هەریەکە لە (كۆمەڵەی زەحمەتكێشانی كوردستان- كۆمەڵەی زەحمەتكێشانی كوردستانی ئێران- كۆمەڵەی حزبی كۆمۆنیستی ئێران)ن، ئەوانیش لە رابردوو ئێستاش رێککەوتنیان لەگەڵ بەڕێوەبەرایەتی ئاسایشی سلێمانی هەیە.
کۆمەڵەکان لە رۆژی نیشتەجێبوونیان لە سنوری سلێمانی دەڵێن:” نامانەوێت ئاسایشی هەرێمی کوردستان و سلێمانی خراپبێ، ئەمەش وەک خراپ نەبوونی نێوانی رۆژهەڵات و باشوور لێکدەدەنەوە، ئێستاش دەڵێن، هەر بەهەمان باوەڕی جاران قبوڵمان كردووە ئەو شوێنانە بەجێبهێڵین”.
رۆژی 19ی ئازاری 2023، عەلی شەمخانی ئەمینداری گشتی ئەنجومەنی ئاسایشی نەتەوەیی پێشووی عێراق سەردانی بەغدادی كرد، لەگەڵ قاسم ئەعرەجی راوێژكاری ئەنجومەنی ئاسایشی نیشتمانی عێراق رێككەوتنی ئەمنیی پاراستنی سنورەكانی ئیمزا كرد، ئەم رێككەوتنە ناوی لێنرا “كۆنوسی ئەمنیی”، ئامانجی سەرەكی رێككەوتنەكە پاككردنەوەی سنوری هەرێمی كوردستان و ئێران بوو لە هێزەكانی رۆژهەڵاتی كوردستان، بەشێكی تری رێككەوتنەكە جەخت لەسەر چەككردن‌و گواستنەوەی هێزەكانی رۆژهەڵاتی كوردستان بوو لەناو هەرێمی كوردستان، بۆ ناو چەند كەمپێكی نوێ.
پارتی و یەكێتیی لەرێگەی نوێنەرە ئەمنییەكانی خۆیانەوە (رێبەر ئەحمەد وەزیری ناوخۆی هەرێم و هیوا ئەحمەد سەرۆكی دەزگای ئاسایشی گشتی هەرێم) هەرزوو پابەندبوونی خۆیان بە رێككەوتنە ئەمنییەكەی نێوان تاران و بەغداد نیشاندا.
رۆژی 27ی ئەیلولی 2023، وەفدێكی ئێران كە بۆ بەشداری لە كۆنگرەی پێنجەمی یەكێتیی سەردانی سلێمانیان كردبوو، چونە زڕگوێزو بەناو كەمپی حزبەكانی رۆژهەڵاتدا سوڕانەوەو وێنەیان گرت، وەفدەكە دوو كەس بوون، یەكێكیان (حەسەن دانایی فەڕ)و ئەوی تر (ئاغای مسگریان) بوو، كە دوو فەرماندەن لە سوپای قودس، یەكێتیی بەم كارە ویستی دڵنیایی بە ئێران بدات كە كەمپەكەی چۆڵ كردووەو هێزی پێشمەرگەی تێدا نەماوە.
بەگوێرەی زانیاریەکانی ئازا پرێس، دیموکراتەکانی کۆیەش لە رێگەی پارتیەوە دوای هێنانە خوارەوەیان لە سنورەکانی برادۆست و روستێ، ئێستا بڕیاریان داوە لە کامپەکانی جارانیان لە ئازادی و ئامریە بمێنەوە بەمەرجی تەڵبەند کردنیان.
حکومەتی ئێران دوای ئەوەی خۆپیشاندانەکانی ژن، ژیان، ئازادی لە ناوخۆ سەرکوتکرد، دواتر هەوڵیدا لە دەرەوەش ئەو هەنگاوە هەڵێنێ، بۆیە لە رێگەی رێککەوتنی سیاسی لەگەڵ عێراق و جێبەجێکردنی حکومەتی هەرێم، هەوڵە دووساڵیەکەی لەبەرانبەر کۆمەڵەکان و دیموکراتەکان جێبەجێ دەبێ لە بێ چەککردن و لەکامپی مەدەنی کۆ کردنەوەیان. دیار نییە ئەو رێکخستنانە بۆ داهاتوو چ رۆڵێکیان دەمێنێ لە بزووتنەوەی سیاسی رۆژهەڵاتی کوردستان. هەروەها ئەوەش دیار نییە، ئایا دەوڵەتی ئێران هەر بەوەندیان لێدەگڕێ، یان پیلانی تری هەیە بۆ بەیجگاری بڵاوە پێکردنیان؟؟
