ئا:ئازاپرێس
لە نوسراوێکی کۆمسیۆنی باڵای سه‌ربه‌خۆی هه‌ڵبژاردنه‌كانی عێراقدا، هەریەکە لە شێروان شێروانی كاندید لە لیستی هەڵوێست لە هەولێر، جەعفەر عوسمان كاندیدی بزوتنه‌وه‌ی گۆڕان له سلێمانی و شڤان سەعید كاندیدی نەوەی نوێی لە پارێزگای دهۆک دورخسته‌وه.
به‌گوێره‌ی نوسراوی كۆمسیۆنی باڵای سه‌ربه‌خۆی هه‌ڵبرژاردنه‌كان، شێروان ئه‌مین نه‌عۆ سلێمان (شێروان شێروانی) كاندیدی ژماره یه‌ك له لیستی هه‌ڵوێست له پارێزگای هه‌ولێر، شڤان سه‌عید عومه‌ر كاندیدی ژماره یه‌ك له لیستی نه‌وه‌ی نوێ له پارێزگای دهۆك و جەعفەر عوسمان كاندیدی ژمارە 44ی بزوتنه‌وه‌ی گۆڕان له سلێمانی دورده‌خرێنه‌وه.
هەروەها لە نوسراوه‌كەدا هاتووە، كۆمسیۆنی هەڵبژاردنەكان هۆكاری دورخستنەوەی كاندیدەكانی بۆ نەبونی مەرجی پێویست و ئەنجامدانی سەرپێچی گەڕاندۆتەوە و ئەوەشیخستۆتەرو، لایه‌نه سیاسییه‌كان ئاگادارده‌كرێنه‌وه له‌ماوه‌ی سێ رۆژ له‌ده‌رچونی ئه‌و بڕیاره، كاندیدی جێگره‌وه پێشكه‌ش بكه‌ن.
بە گوێرەی ئەو زانیارانەی دەست ئازاپرێس کەوتووە هۆکاری دوورخستنەوە شێروان شێروانی و شڤان سەعید لەسەر سکاڵای وەزارەتی ناوخۆی هەرێمی کوردستان بووە، تاکو کاندیدبوونیان پوچەڵبکرێتەوە.
لەهەر چوار پارێزگاكەی هەرێم لەكۆی 2 ملیۆن و 899 هەزارو 578 كارتی دەنگدان 2 ملیۆن و 685 هەزارو 466 كارتی دەنگدان لەلایەن خاوەنەكانیانەوە وەرگیراونەتەوە و 214 هەزار و 112 كەسیش تاوەكو ئێستا كارتەكانیان وەرنەگرتووەتەوە.
بڕیاره رۆژانی 16 و 17ی ئه‌م مانگه بانگه‌شه كاندید و لایه‌نه سیاسییه‌كان ده‌ستپێبكات بۆ هه‌ڵبژاردنی په‌رله‌مانی كوردستان كه 20ی (تشرینی یه‌كه‌م/10) به‌ڕێوه‌ده‌چێت.
