یوسف بەحرکە
بەهۆی بۆردومانەکانی دەوڵەتی تورکیا ، لە سەرەتایی ئەمساڵەوە (٢٣) هاوڵاتی لە ناوچە جیاجیاکانی هەرێمی کوردستان گیانیان لەدەستداوە و (١٧) کەسی دیکەش برینداربوون .
لەدوای ڕووخانی ڕژێمی بەعسەوە تاوەکو ئێستا توركیا ٢٥ هەزار پێشێلكاریی ئەنجامداوەو ، خاكی عێراق زیاتر لە چوار هەزارو ٢٠٠ كیلۆمەتری چوارگۆشە لەژێر داگیركاریی توركیادایەو سوپاکەشی بە قووڵایی ١٨٥ كیلۆمەتر هاتوونەتە خاكەکەیی و لە ئێستادا تەنیا ٢٨ كیلۆمەتر لە ناوەندی پارێزگای نەینەواوە دوورن .
ژمارەی هێزەكانی سوپای توركیا لە هەرێمی کوردستان لە ژمارەی سەربازانی ئەمریكی لە عێراق زیاترە و پێشێلكارییەكانی سوپای توركیا بە ئاشكرا بووەتە داگیركردنی خاكی عێراق و لەئێستادا ۵ هەزار سەرباز و ٨٠ بنكەی سەربازیی و ژمارەیەک بنكەی هەواڵگریی لە خاكی هەرێمی كوردستان جێگیركردووە .
دەوڵەتی تورکیا بەردەوامە لە داگیركردنی خاكی هەرێمی كوردستان و كردنە ئامانجی ڕۆژنامەنووسان و هاوڵاتیانی مەدەنی، تا ئێستاش نە حكوومەتی عێراق و نە حكوومەتی هەرێمی كوردستان هێچ هەڵوێستێكی كردارییان بەرامبەر بەو تاوانانە نەبووە
مەترسی گەورەی داگیركاریی توركیا ئەوەیە كە ئەو وڵاتە بنكەی سەربازیی جێگیری دامەزراندوە ، کەبەداخەوە ئەو بنكە جێگیركراوانە ئاماژەن بۆ نییەتێكی درێژخایەن و لەوەدەچێ نیەتی تەنها کۆنترۆڵکردنی قەندیل و هەڵوەشاندنەوەی قەوارەی هەرێم نەبێت و مەبەست و نیازی زۆر لەوە گەورەتری هەبێت
ئەم وتارە راو و بۆچوونی نووسەر خۆیەتی
